Isroil Rafah shahriga havo hujumi uyushtirdi

Isroil harbiy-havo kuchlari blokadadagi G‘azo sektorining janubidagi Rafah shahriga zarba berdi. Bu haqda Falastinning WAFA axborot agentligi xabar berdi.

Bildirilishicha, hujum oqibatida 12 falastinlik, jumladan, olti nafar bola halok bo‘lgan, o‘nlab odamlar yaralangan.

Ma’lumotlarga ko‘ra, Isroil kuchlari Az-Zuhur mahallasidagi turar-joy binosiga zarba bergan. Uy falastinlik Harb oilasiga tegishli edi. Halok bo‘lgan falastinliklarning shaxsi haqida ma’lumot berilmagan.

Isroil harbiy samolyotlari Rafahdan tashqari eksklavdagi boshqa shaharlarga ham hujum qildi. G‘azo sektorining shimolidagi Jabaliya qochqinlar lageri va janubidagi Xon Yunus shahri kuchli o‘qqa tutildi.

Ma’lumot uchun, Isroilning HAMAS bilan urushi 7-oktyabrdan beri davom etmoqda. 22-noyabr kuni tomonlar o‘t ochishni to‘xtatish bo‘yicha kelishib oldi va bu kelishuv bir necha bor uzaytirildi. 1-dekabr kuni Isroil armiyasi G‘azoda operatsiyani qayta boshladi.

Eslatib o‘tamiz, oldinroq SAXAL bosh shtabi boshlig‘i Gersi Halevi Isroil harbiylari G‘azo sektorida quruqlikdagi operatsiyaning uchinchi bosqichini boshlagani va anklav janubidagi Xon Yunus shaharchasini o‘rab olganini ma’lum qilgandi.