Ispaniya Seutadagi 500 nafar muhojir bolani materikka o‘tkazadigan bo‘ldi

Ispaniya hukumati Afrikaning shimolida joylashgan Seuta hududida bo‘lgan 500 nafar voyaga yetmagan muhojir bolalarni Ispaniyaning materik qismiga ko‘chirishga qaror qildi. Bu haqda “The Guardian” xabar berdi.

Ma’lum qilinishicha, joriy yilning 30 iyul kuni Marokashdan Seutaga taxminan 70 ming kishi o‘tishga uringan. Ularning aksariyati keyinchalik Marokashga qaytarilgan. Biroq Ispaniya qonunchiligiga ko‘ra, yolg‘iz holda kelgan voyaga yetmagan muhojirlar 18 yoshga to‘lguniga qadar davlat himoyasida bo‘lishi kerak.

Avvalroq, 13 avgust kuni Ispaniya ichki ishlar vaziri Fernando Grande-Marlaska Seuta yoki Melilyaga noqonuniy kirgan har qanday shaxs ortga qaytarilishini aytgan edi. U bunday muhojirlar Ispaniya materigiga o‘tkazilmasligini ham ta’kidlagan.

Yangi qarorga ko‘ra, eng himoyaga muhtoj bolalar, xususan, qizlar bilan nodavlat tashkilotlar va bolalarni himoya qilish idoralari shug‘ullanadi. Bu orqali ularni Ispaniyaning avtonom hududlari hukumatlariga rasman biriktirmaslik rejalashtirilmoqda.

Ayni paytda Ispaniyadagi ayrim konservativ va o‘ta o‘ng siyosiy kuchlar muhojir bolalarni qabul qilishga qarshi chiqmoqda. Xususan, Xalq partiyasi hukumat rejasini rad etib, bolalarni o‘z oilalari bag‘riga qaytarish kerakligini bildirgan.

Yevropa Ittifoqi ham Ispaniya hukumati qaroriga nisbatan o‘z pozitsiyasini bildirgan. Yevropa komissiyasi vakili Markus Lammertning ta’kidlashicha, Yevropa qonunchiligiga ko‘ra, Seutada qolgan barcha noqonuniy muhojirlar, jumladan, yolg‘iz voyaga yetmaganlar ham Marokashga qaytarilishi kerak.

Ispaniya hukumati esa mamlakatning amaldagi qonunchiligi yolg‘iz voyaga yetmagan muhojirlarni himoya qilishni talab qilishini bildirmoqda. Yevropa Ittifoqining yangi migratsiya pakti hali Ispaniya qonunchiligiga to‘liq kiritilmagani sababli, hozircha mamlakatning ichki qoidalari amal qilmoqda.

Ma’lumotlarga ko‘ra, joriy yil mart oyi holatiga ko‘ra, Ispaniyada 16–23 yoshdagi 21 mingdan ortiq shaxs davlat himoyasida bo‘lgan. Ularning qariyb 3,5 ming nafari 17 yoshdan kichik bo‘lgan, taxminan yarmi esa Marokashdan kelgan.

Eslatib o‘tamiz, avvalroq Ispaniyaning Shimoliy Afrikadagi Seuta anklaviga bostirib kirgan yuzlab migrantlar shahardagi plyajlardan birida norozilik namoyishi o‘tkazgani haqida xabar berilgan edi.