Indoneziyadagi zilzila qurbonlari soni 47 kishiga yetdi

Indoneziyaning Flores oroli sohillarida yuz bergan kuchli zilzila kamida 47 kishining hayotiga zavol bo‘ldi. Qutqaruvchilar vayronalarni tozalashni davom ettirishmoqda. Bu haqda “Straits Times” xabar berdi.

Qayd etilishicha, Indoneziyada sodir bo‘lgan zilzila oqibatida halok bo‘lganlar soni 47 kishiga yetgan, yana 50 kishi tan jarohati olgan. Qidiruv-qutqaruv operatsiyasiga yordam berish uchun ikkita vertolyot va bitta samolyot tayyorlangan.

Zilziladan jabr ko‘rgan hududlardagi bir nechta binolarda aholi qamalib qolgani xabar qilinmoqda. Bundan tashqari, bir qator yo‘llarni to‘sib qo‘ygan ko‘chkilar haqida ma’lumotlar bor.

Bungacha qutqaruv xizmati Maumere port shahri atrofida 20 kishining jasadi topilgani, olti kishi jarohatlangani va ikki kishi vayronkor vayronalar ostida qamalib qolgani haqida xabar bergan.

Eslatib o‘tamiz, 15 avgustga o‘tar kechasi Indoneziyaning Flores oroli yaqinida 7,7 magnitudali zilzila sababli uchta provinsiyada sunami xavfi e’lon qilingan edi. “Jakarta Globe” nashrining xabar berishicha, yer silkinishlari turar joy binolari, maktablar, davlat muassasalari va shifoxonalarning vayron bo‘lishiga olib kelgan.

Milliy ofatlarni boshqarish agentligi xabariga ko‘ra, asosiy silkinishdan so‘ng magnitudasi 6,2 gacha bo‘lgan bir qator aftershoklar (qayta yer silkinishlari) qayd etilgan.