Icroil G‘arbiy sohilni anneksiya qilsa, AQSHni yo‘qotadi – Tramp

AQSH Prezident Donald Tramp Isroilning G‘arbiy Sohilni anneksiya qilish taklifini rad etdi va bunga keskin qarshi ekanini bildirdi. Bu haqda u “The Time” jurnaliga bergan intervyusida ma’lum qildi.

AQSH Prezidentining so‘zlariga ko‘ra, u arab mamlakatlariga bu sodir bo‘lmasligi haqida va’da bergan va buni ustidan chiqishi kerak. 

“Bu sodir bo‘lmaydi, chunki men arab mamlakatlariga va’da berganman va hozir bu sodir bo‘lishi mumkin emas. Arablar bizni faol ravishda qo‘llab-quvvatlamoqda. Agar bu sodir bo‘lsa, Isroil Qo‘shma Shtatlarning barcha qo‘llab-quvvatlashini yo‘qotadi”, degan Tramp. 

Trampning bayonoti 15 oktyabr kuni e’lon qilingan edi, ammo intervyuning nashr etilishi Isroil parlamenti (Knesset) tomonidan mamlakat suverenitetini bosib olingan G‘arbiy Sohilgacha, asosan, anneksiyaga kengaytirish to‘g‘risidagi qonun loyihasining dastlabki tasdiqlanishi bilan bir vaqtga to‘g‘ri keldi. Yigirma besh a’zo qonun loyihasini ilgari surish uchun ovoz berdi, 24 kishi esa qarshi ovoz berdi, jumladan, Bosh vazir Binyamin Netanyaxuning “Likud” partiyasi ham qarshilar safiga kirdi. Bu qonun loyihasining qabul qilinishining to‘rt bosqichidan faqat birinchisi.

Bu tashabbus AQSH vitse-prezidenti Jey Di Vens va Davlat kotibi Marko Rubio tomonidan allaqachon tanqid qilingan. Vens Knesset qarorini “ahmoqona siyosiy hiyla” va Qo‘shma Shtatlarga nisbatan “haqorat” deb atagan.

Falastin Tashqi ishlar vazirligi ham Isroil parlamentining qarorini qoralagan.

Ma’lumot uchun, Isroil 1967 yil olti kunlik urush paytida G‘arbiy Sohilni egallab olgan va uni ishg‘ol qilingan emas, balki bahsli hudud deb hisoblab kelmoqda. Biroq, bu pozitsiyani xalqaro hamjamiyat va BMT qo‘llab-quvvatlamaydi. 

Qayd etish joiz, oktyabr oyida Trampning sa’y-harakatlari tufayli G‘azo sektorida sulh tuzildi. U 10 oktyabrdan beri amalda bo‘lib, ba’zi qoidabuzarliklar kuzatildi. Bu davrda, 2023 yil 7 oktyabrda HAMAS tomonidan garovga olingan barcha tirik qolganlar Isroilga qaytib keldi va halok bo‘lganlarning jasadlarini topshirish jarayoni davom etmoqda. Bunga javoban, yuzlab falastinlik mahbuslar ozod qilindi.

Eslatib o‘tamiz, ushbu jurnalga bergan intervyusida Tramp G‘azo sektoriga tashrif buyurish niyatini e’lon qilgandi. Oq uy rahbarining minglab falastinliklar qabristoniga aylangan hududga aynan qachon borishi noma’lum, lekin ba’zi OAVlar u tashrifni cho‘zib o‘tirmay yaqin orada amalga oshirishini yozmoqda. Shuningdek, Oq uy rahbari intervyu davomida Yaqin Sharqdagi vaziyatni hal qilishda muhim rol o‘ynaydigan “Tinchlik Kengashi”ga raislik qilish niyatini ham bildirgan.