Germaniyada qurollangan shaxs universitetda otishma uyushtirdi

Bugun, 24 yanvar kuni qurollangan shaxs Germaniyaning janubi-g‘arbiy qismida joylashgan Geydelberg universitetida auditoriya ichidagi odamlarni o‘qqa tutdi. Bu haqda CNN telekanali xabar berdi.

Politsiyaning bildirishicha, hujum oqibatida 4 kishi yaralangan. Jinoyatni sodir etgan qurollangan shaxs voqea joyida halok bo‘lgan. 

Universitet hududiga qurol bilan kirishga muvaffaq bo‘lgan shaxs ma’ruza o‘tilayotgan auditoriyaga qarata o‘q uza boshlagan. Xona ichkarisida bo‘lganlar qochib chiqishga ulgurgan, ammo 4 nafar talaba jarohatlangan. Jarohatlanganlardan birining ahvoli juda og‘ir ekanligi aytilmoqda.

Politsiya jinoyatchi otishma uyushtirganidan so‘ng voqea joyida o‘zini ham o‘ldirgan deya hisoblamoqda. 

Hozircha qurollangan shaxsning bunday yo‘l tutishiga nima sabab bo‘lgani aniq ochiqlanmayapti. 

Voqea yuzasidan politsiya va tergov guruhi katta surishtiruv ishlarini boshlagani aytilmoqda. 

Qayd etilishicha, Germaniyaning Noyenxaymer-Feld shahrida joylashgan Geydelberg universiteti mamlakatdagi eng tarixiy ta’lim dargohlaridan biri hisoblanadi.

Behruz Saidov