Germaniya Ukrainaga qurol ta’minotini moliyalashtiradi (video)

Germaniya Ukraina uchun Amerikaning Raytheon kompaniyasi tomonidan ishlab chiqarilgan bir necha yuzlab Patriot havo hujumidan mudofaa tizimi (HHM) raketalarini yetkazib berishni moliyalashtiradi. Bu haqda Germaniya Mudofaa vazirligi xabar berdi.

Qayd etilishicha, bugun, 14 aprel kuni Germaniya-Ukraina hukumatlararo maslahatlashuvlari doirasida havo hujumidan mudofaani kuchaytirish, uchuvchisiz tizimlarni rivojlantirish va qurol-yarog‘ sohasidagi hamkorlikni kengaytirishga qaratilgan qator kelishuvlar imzolangan.

“Havo hujumidan mudofaani yanada kuchaytirish maqsadida biz Ukrainaning Raytheon kompaniyasi bilan bir necha yuzlab Patriot raketalarini yetkazib berish bo‘yicha shartnomasini moliyalashtirmoqdamiz. Bundan tashqari, Diehl Defence kompaniyasi bilan IRIS-T tizimlari uchun qo‘shimcha uchirish qurilmalarini yetkazib berish bo‘yicha kelishuvga erishildi. Ushbu loyiha ham Germaniya tomonidan moliyalashtiriladi va muhim infratuzilma hamda shaharlar himoyasini sezilarli darajada yaxshilaydi”, deyiladi vazirlik press-relizida.

Germaniya va Ukraina, shuningdek, o‘rta va uzoq masofaga uchuvchi dronlarni ishlab chiqarish bo‘yicha ham kelishib olgan. Loyiha Kiyevga minglab dronlarni yetkazib berish maqsadida qo‘shma korxona tashkil etishni o‘z ichiga oladi. Bundan tashqari, Germaniya Ukrainaga dushmanning chuqur nishonlarini yo‘q qilish uchun mo‘ljallangan uzoq masofali qurol tizimlarini moliyalashtirishda yordam beradi.

“Bu bir necha yuz million yevro miqdoridagi investitsiyalarni o‘z ichiga oladi”, deb xabar berdi Germaniya Mudofaa vazirligi.

Qo‘shimcha ravishda, Germaniya va Ukraina jang maydonidagi ma’lumotlarni almashish to‘g‘risida kelishuv imzolagan.

“Bu yerga, xususan, PzH 2000, RCH 155 va IRIS-T kabi nemis qurol tizimlarini qo‘llash tahlili, shuningdek, Ukrainaning jang maydonidagi tajribasi va ma’lumotlari, jumladan, Avengers, DELTA kabi raqamli tizimlar va boshqa yechimlar bilan almashish kiradi”, deyiladi hujjatda.