G‘azoda nafaqat bolalar, balki BMT tizimi ham o‘lmoqda – Erdo‘g‘an 

Turkiya Prezidenti Rajab Toyib Erdo‘g‘an BMTning harakatsiz va ishlamaydigan tashkilotga aylangani va islohotga muhtojligini aytdi. Bu haqda u bugun, 24 sentyabr kuni Nyu-Yorkda BMT Bosh Assambleyasida so‘z ochdi. 

"Biz so‘nggi yillarda BMT o‘zining asosiy missiyasini yetarli darajada bajarmagani va tobora ko‘proq ishlamay qolgan, noqulay va inert tuzilmaga aylanib borayotganini afsus bilan kuzatdik. Hozirgi kunda bizga “Dunyo beshdan katta” [BMT Xavfsizlik Kengashining doimiy a’zolari] shiori bilan ifodalanadigan qadriyatlar tobora ko‘proq zarur. Biz xalqaro tinchlik va xavfsizlikni faqat beshta imtiyozli davlatga qoldirish uchun juda muhim ekaniga guvohmiz. O‘zgarishlar kerak”, deydi u. 

Erdo‘g‘anning fikricha, “BMT samarasizligining eng dramatik misoli G‘azo sektorida 353 kundan beri davom etayotgan qirg‘in bo‘ldi”. U Isroilning 7 oktyabrdan beri uzluksiz davom etayotgan hujumlari oqibatida 41 mingdan ortiq falastinlik halok bo‘lganini, ularning aksariyati bolalar va ayollardan iborat ekanini qo‘shimcha qildi.

“Bir luqma quruq non, bir qultum suv, bir piyola osh topa olmagani uchun hozirgacha yuzlab G‘azo bolalari halok bo‘ldi. G‘azoda nafaqat bolalar, balki Birlashgan Millatlar Tashkiloti tizimi ham o‘lmoqda, haqiqat o‘lmoqda. G‘arb himoya qilmoqchi bo‘lgan qadriyatlar o‘lib bormoqda. Insoniyatning adolatliroq dunyoda yashash umidlari birin-ketin so‘nib bormoqda.

Men bu yerda aniq so‘rayman: Ey inson huquqlari tashkilotlari, G‘azodagilar va G‘arbiy Sohildagilar inson emasmi? Falastindagi bolalarning o‘qish, yashash va ko‘chada o‘ynashga haqqi yo‘qmi? Ey xalqaro matbuot tashkilotlari, Isroil jonli efirda o‘ldirgan, idoralari bosqinga uchragan jurnalistlar hamkasblaringiz emasmi? O Birlashgan Millatlar Tashkiloti Xavfsizlik Kengashi, G‘azo qirg‘inining oldini olish va bu zulm va vahshiylikka chek qo‘yish uchun nima kutmoqdasiz?” deydi Turkiya yetakchisi.

Shuningdek, u BMT shtab-kvartirasida Falastin vakillarini ko‘rishdan xursand ekanligini ta’kidladi.

“Umid qilamanki, bu tarixiy qadam Falastinning Birlashgan Millatlar Tashkilotiga to‘laqonli a’zo bo‘lishi yo‘lidagi yakuniy burilish nuqtasi bo‘ladi. Men hali Falastinni tan olmagan boshqa davlatlarni shunday qilishga va bu juda muhim davrda tarixning to‘g‘ri tomonida turishga chaqiraman”, deydi Erdo‘g‘an.