Futbol klublari qishki transferlarda salkam 1,5 mlrd dollar xarajat qildi
Sport
−
14 fevral 2792
Futbol klublarining qishki transfer oynasidagi xarajatlari 1,46 mlrd dollarga yetdi. Bu haqda Xalqaro futbol federatsiyasi (FIFA) yanvar oyi uchun moliyaviy hisobotida ma’lum qildi.
Klublar 2024 yilning yanvariga kelib transferlarga salkam 1,5 milliard dollar sarflagan. Qishki transfer oynasidagi moliyaviy xarajatlar soni bo‘yicha rekord 2023 yilda o‘rnatilgan, o‘shanda klublar jami 1,57 milliard dollar ishlatgan. 2024 yilning yanvar oyida klublar tomonidan amalga oshirilgan transferlar soni 4716 tani tashkil etib, bu o‘tgan davrga nisbatan 0,6 foizga oshganini ko‘rsatmoqda.
Fransiya klublari 2024 yilning yanvar oyida futbolchilar uchun eng ko‘p mablag‘ sarflagan – 291,9 million dollar. Bu ularning o‘tgan yilning yanvar oyida sarflagan mablag‘idan ikki baravar ko‘p. O‘tgan yili eng ko‘p mablag‘ sarflagan ingliz klublari ikkinchi o‘ringa tushib ketdi. Ularning xarajatlari qariyb 80 foizga qisqardi – 2023 yil yanvarida bu miqdor 898,6 million dollarni tashkil etgan.
Ayollar futbolida klublar sarflagan mablag‘i bo‘yicha rekord o‘rnatdi – 2,1 million dollar. Transferlarning umumiy qiymati 165,5 foizga oshgan.
