Farg‘onadagi dahshatli YTHda ikki maktab o‘quvchisi ham halok bo‘lgani aytildi

Avvalroq Farg‘ona viloyatining Uchko‘prik tumanida ISUZU rusumli yuk mashinasi svetoforda to‘xtab turgan Damasʼga borib urilishi oqibatida 2 kishi halok bo‘lgani haqida xabar bergan edik. Vafot etganlar soni yana ikki kishiga ortdi. Bu haqda “Zamon” dasturida ma’lum qilindi.

Aytilishicha, ushbu yo‘l-transport hodisasida halok bo‘lgan yana ikki nafar shaxs Buvayda tumanidagi 7-sonli umumta’lim maktabining o‘quvchilari bo‘lgan. O‘quvchi qizlar tongda onalariga yordamlashish maqsadida sabzi yulish uchun dalaga ketayotgan bo‘lgan. 

Mazkur yo‘l-transport hodisasidan so‘ng Buvayda tumanidagi shoshilinch tibbiyot bo‘limiga jami 10 nafar fuqaro olib kelingan. Ulardan besh nafari ayollar bo‘lgan, yana besh nafari esa o‘quvchilardir. Hozirda 6 kishi shifoxonada davolanmoqda, ularning ayrimlarining ahvoli yomon.

Shuningdek, ma’lum qilinishicha, o‘quvchilarning ota-onalari farzandlari mehnatga jalb qilingani uchun avval ham bir necha marotaba jarimaga tortilgan.

Ushbu holat yuzasidan ISUZU haydovchisiga nisbatan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilib, qamoq ehtiyot chorasi qo‘llanilgan.