Xoniyaning o‘limiga Eronning javobi Isroilni hayratga solishi mumkin – WSJ

Eronning Isroilga yangi hujumi aprel oyidagidan ko‘ra kuchliroq va kutilmagan bo‘lishi mumkin, chunki Islomiy respublika o‘z rejalari haqida hech kimga xabar bermayapti. Bu haqda “The Wall Street Journal” xabar berdi.

Qayd etilishicha, oxirgi marta Eron diplomatlarni oldindan xabardor qilib, AQSH va Isroilga tayyorgarlik ko‘rish imkoniyatini berib, yahudiy davlati yo‘nalishi bo‘yicha 300 dan ortiq dron va raketalarni uchirgan. Natijada snaryadlarning aksariyati tutib olingan.

“Bu safar Isroil va uning ittifoqchilari bo‘shliqda harakat qilmoqda”, deya ta’kidlaydi gazeta.

Yaqin Sharqdagi keskinlashuvning oldini olishga urinayotgan amerikalik va arab diplomatlari Tehronda HAMAS siyosiy byurosi rahbari Ismoil Xoniya va Bayrutda “Hizbulloh” harbiy qo‘mondoni Fuad Shukrning o‘ldirilishi uchun qasos olishga tayyorlanayotgan Eron va “Hizbulloh”ning g‘azablangan sukunatiga duch kelishmoqda.

Amerika ma’muriyatining ismini oshkor etmagan vakilining nashrga aytishicha, Vashington hamon ehtiyotkor, chunki u Eron Isroilga javob zarbasi qanday bo‘lishini allaqachon hal qilib qo‘yganini ko‘rmayapti. Bu yaqin kunlarda sodir bo‘lishi mumkin.

Pentagon Isroilni himoya qilish uchun Yaqin Sharqqa qo‘shimcha kuchlar, jumladan ballistik raketalardan himoya qilishga qodir kreyser va esmineslar yuborilayotganini ma’lum qilgan. Qo‘shma Shtatlar, shuningdek, qo‘shimcha yerdagi ballistik raketalarga qarshi mudofaa vositalarini joylashtirishga tayyorlanmoqda.