Eron: yadrochi olimga suiqasd bo‘lishini avvaldan bilganmiz

Eron hukumati yadrochi olim Muxsin Faxrizodaga suiqasd qilinishi ehtimoli haqida ma’lumotga ega bo‘lgan. Bu haqda bugun, 30 noyabr kuni Eron Milliy Xavfsizlik Oliy Kengashi kotibi Ali Shamxoniy ma’lum qildi. 

“20 yil davomida dushmanlar uni o‘ldirmoqchi bo‘ldi. Ammo shu paytgacha ular buni uddalay olmadi”, Ali Shamxoniy. Uning qo‘shimcha qilishicha, Eron xavfsizlik kuchlari bunday harakat ehtimoli borligini avvaldan taxmin qigan.

Shamxoniyning so‘zlariga ko‘ra, razvedka ma’lumotlariga Faxrizoda suiqasd uyushtirish uchun nishon ekani haqida ma’lumot kelib tushgan.

Shuningdek, Shamxoniy Faxrizodani o‘ldirish jinoyat sodir etilgan joyda qotillar ishtirokisiz elektron uskunalar yordamida sodir etilganini aytdi.

“Operatsiya juda murakkab kechgan va elektron uskunalar yordamida amalga oshirilgan. Voqea joyida qotillardan hech kim yo‘q edi”, deydi u.

Shu bilan birga, Shamxoniy qotillik ortida Isroil va uning maxsus xizmatlari turganini tasdiqladi.

Eslatib o‘tamiz, avvaroq Eron Mudofaa vazirligi yadroviy fizik Muhsin Faxrizoda o‘ldirilgani haqida xabar bergan edi. U Eron poytaxti yaqinidagi Absard aholi punktida terrorchilar hujumi qurboni bo‘ldi.

Eron Tashqi ishlar vaziri Muhammad Javod Zarif Isroilning yadrochi olim qotilligiga aloqadorligini e’lon qilgandi. U xalqaro hamjamiyatni, xususan Yevropa Ittifoqini ikki tomonlama standartlar siyosatiga barham berishga va “davlat terrorizmi” harakatini qoralashga chaqirdi. 

Keyinchalik, yadrochi olimining o‘limidan so‘ng, Eron AQSH va Isroilni ogohlantirdi. “Eron o‘z xalqi va manfaatlarini himoya qilish uchun barcha zarur choralarni ko‘rish huquqini o‘zida saqlab qoladi”, deyiladi Islom Respublikasining Birlashgan Millatlar Tashkilotidagi doimiy vakili Majid Taxt-Ravanchining BMT Bosh kotibi va Xavfsizlik Kengashi Raisining nomiga yuborgan maktubida.

Eronda olimning o‘limi munosabati bilan 40 kunlik motam e’lon qilindi.

Shuningdek, BMT dunyo mamlakatlariga Eronda mamlakatning yadro dasturi rahbarlaridan biri bo‘lgan fizik Muxsin Faxrizodaning o‘ldirilishi munosabati murojaat qilib, ehtiyotkor bo‘lishga chaqirdi.