Eron Prezidenti Isroilning yo‘q qilinishiga umid bildirdi

Eronning saylangan Prezidenti Mas’ud Pezeshkiyon Tehronda HAMAS Siyosiy byurosi rahbari Ismoil Xoniya bilan uchrashuv o‘tkazdi va unda Falastin guruhlari va Isroil o‘rtasidagi mojaro yahudiy davlatining yo‘q qilinishi bilan yakunlanishiga ishonch bildirdi. Bu haqda Pezeshkiyon ma’muriyati bayonot berdi.

“Eron xalqi sionistik rejimning jinoyatlari va tajovuzidan nafratlanib kelgan, mazlum Falastin xalqining huquqlarini qo‘llab-quvvatlagan va bu yordamni yanada kuchliroq davom ettiradi. Falastin xalqining bu jinoyatlarga qarshi shiddatli qarshilik ko‘rsatishi g‘urur manbaidir. Va ishonchimiz komilki, bu kurash Falastin xalqining yakuniy g‘alabasi va Falastin zaminining ozod etilishi hamda sionistik rejimning vayron bo‘lishi bilan yakunlanadi”, deydi Pezeshkiyon.

Inauguratsiya marosimida ishtirok etish uchun Tehronga borgan HAMAS yetakchisining aytishicha, aprel oyida Isroilning Damashqdagi Eron konsulligini o‘qqa tutganiga javoban Eron Isroil hududiga yirik raketa va uchuvchisiz havo hujumi uyushtirganida, “20 ga yaqin davlat Isroilni qo‘llab-quvvatlashga harakat qilgan”. Xoniyaning so‘zlariga ko‘ra, bu Isroil “strategik inqiroz holatida” ekanligidan dalolat beradi.

U Tehrondan Falastin guruhlarini qo‘llab-quvvatlashni davom ettirishni so‘radi. Eronning oliy rahbari Oyatulloh Ali Xomanaiy ham Xoniya bilan uchrashdi. HAMAS Siyosiy byurosi rahbari G‘azo sektoridagi mojaro avj olganidan beri “300 kun o‘tganini” eslatib, endilikda Falastin g‘alaba qozonishi kerak bo‘lgan muhim bosqichga yetib kelinganini aytdi.

Pezeshkiyon HAMAS siyosiy byurosi rahbaridan tashqari bugun Falastin islomiy jihodi yetakchisi Ziyod an-Nahxalayiy, “Hizbulloh” bosh kotibi o‘rinbosari Shayx Naim Qosim, shuningdek, husiylar rasmiy vakili Muhammad Abdel Salom bilan uchrashdi.

Eronda mamlakatning yangi ijroiya rahbarining qasamyod qabul qilish marosimi bo‘lib o‘tadi. Kamida 80 davlatdan xorijiy vakillar ishtirok etishi kutilmoqda.