Eron Isroilga aloqador kemani qo‘lga oldi (video)

Eron Isroilga tegishli yuk kemasini qo‘lga oldi. Bu haqda bugun, 13 aprel kuni mahalliy nashrlar xabar berdi.

Qayd etilishicha, mintaqada keskinlik hukm surayotgan bir paytda, Hurmuz bo‘g‘ozi yaqinidagi "sionistik rejimga tegishli yuk kemasi" ushlangan. Operatsiya  vertolyot yordamida amalga oshirilgan.

"Eron Harbiy dengiz kuchlari tomonidan vertolyot yordamida o‘tkazilgan maxsus operatsiyada Portugaliya bayrog‘i ostida suzayotgan isroillik milliarderga tegishli  “MCS Aries” nomli konteyner kemasi to‘xtatildi", deyiladi IRNA axborot agentligi xabarida.

MSC yuk tashish kompaniyasi ham buni tasdiqlab, hozirda ekipajning 25 a’zosi hibsga olinganini bildirgan.

Ma’lumot uchun, “MCS Aries” yuk kemasi isroillik milliarder Eyal Oferning Londonda joylashgan Zodiac Group korporatsiyasi tarkibiga kiruvchi Zodiac Maritime kompaniyasiga tegishli.

Eslatib o‘tamiz, oldinroq Bayden Eronni Isroilga hujum qilmaslikka chaqirgandi. Tehron esa Vashingtonni Isroil va Eron o‘rtasidagi mojaroga “burun suqishi" oqibatlaridan ogohlantirdi.