Erdo‘g‘an Trampni Eron bilan muzokaralarni davom ettirishga chaqirdi

Turkiya Prezidenti Rajab Toyib Erdo‘g‘an AQSH Prezidenti Donald Tramp bilan telefon suhbatida Eron va AQSH o‘rtasidagi keskinlikni yumshatish uchun muzokaralarni davom ettirishga chaqirdi. Bu haqda Turkiya Prezidenti ma’muriyati bugun, 18 avgust kuni xabar berdi.

Qayd etilishicha, NATOdagi ikkinchi yirik armiyaga ega va Eron bilan chegaradosh Turkiya urushni to‘xtatishga bir necha bor chaqirgan. Anqara AQSH, Eron, shuningdek, Pokiston va Qatar kabi vositachilar bilan yaqin aloqalarni saqlab, tomonlar o‘rtasida vositachilik ham qilmoqda.

“Eron va AQSH o‘rtasidagi keskinlikka nisbatan diplomatiya imkoniyatlaridan maksimal darajada foydalanish muhim. Biz muzokaralar davom etishini umid qilamiz va Turkiya tinchlik harakatlarini qo‘llab-quvvatlashda davom etadi”, degan Erdo‘g‘an.

Telefon suhbati Eronning yuqori martabali rasmiysi mamlakat urushni doimiy tugatish bo‘yicha muzokaralar to‘xtab qolgani sababli harbiy pozitsiyasini “to‘liq hujumkor” holatga o‘tkazishini aytganidan bir kun o‘tib bo‘lib o‘tgan. Vashington esa vaqtinchalik sulh kelishuvini uzaytirish imkoniyatini rad etgan.

Shuningdek, neft tashuvchi tankerlarning Hormuz bo‘g‘ozi orqali harakatini qayta tiklash bo‘yicha muzokaralarda ham olg‘a siljish kuzatilmayapti.

Ma’lum qilinishicha, Turkiya AQSH va Isroilning Eronga qarshi hujumlarini tanqid qilgan, shu bilan birga Eronning Fors ko‘rfazidagi davlatlarga hujumlarini qoralagan va strategik bo‘g‘ozni qayta ochishga chaqirgan.

Kecha, 17 avgust kuni Turkiya Tashqi ishlar vaziri Eronlik hamkasbi bilan Hormuz bo‘g‘ozini qayta ochish va sulhni davom ettirish masalalarini muhokama qilgan.

Turkiya Prezidenti ma’muriyatining ma’lum qilishicha, Erdo‘g‘an va Tramp ikki tomonlama munosabatlar, G‘azodagi urush, shuningdek, Turkiya, Saudiya Arabistoni va Pokiston o‘rtasida imzolangan mudofaa kelishuvini ham muhokama qilgan. Erdo‘g‘an ushbu kelishuvni mintaqaviy barqarorlik va xavfsizlik uchun “kuchli pozitsiya” belgisi sifatida baholagan.

Manbaga ko‘ra, Erdo‘g‘an Trampga Isroilning falastinliklarga qarshi hujumlari Trampning G‘azo bo‘yicha tinchlik rejasining ikkinchi bosqichi amalga oshirilishi kerak bo‘lgan bir paytda kuchayganini aytgan.

Eslatib o‘tamiz, avvalroq Suriya Prezidenti Ahmad ash-Sharaa Turkiya va Saudiya Arabistoni o‘tgan yili mamlakatga qarshi sanksiyalarni bekor qilish bo‘yicha vositachilik qilganini, Turkiya Prezidenti Rajab Toyib Erdo‘g‘an esa bu masalada AQSH rahbariyati bilan muzokaralar olib borganini aytgandi.