Erdo‘g‘an Suriya hududlarini Turkiyaga qo‘shib olishga va’da berdi (video)

Kecha, 13 dekabr kuni Turkiya Prezidenti Rajab Toyib Erdo‘g‘an mamlakatning Sakarya shahrida o‘tkazilgan yig‘ilishda Usmonli viloyatlari bo‘lgan hozirgi Suriya hududlarini qaytarishini aytdi. Bu haqda “Milliyet” xabar berdi.

Erdo‘g‘anning so‘zlariga ko‘ra, u birinchi navbatda Suriya hududlarining to‘rtta viloyatini o‘z mamlakatiga qo‘shish niyatida, shundan so‘ng Birinchi jahon urushi oqibatlarini qayta ko‘rib chiqish masalasini ko‘taradi.

Shuningdek, Prezident Turkiya hech qachon Suriya bilan tarixiy va madaniy bog‘liqligini yo‘qotmaganini ta’kidlagan.

“Agar Birinchi jahon urushidan keyin sharoitlar boshqacha bo‘lganida, bugungi chegara chizig‘i ham o‘zgarishi mumkin edi”, degan u.

Qolaversa, Erdo‘g‘an Suriyadagi shaharlar va ularning aholisini “bizning odamlarimiz” deb atagan.

U nutqi davomida Suriyaning Halab, Idlib, Hama, Damashq va Raqqa kabi viloyatlarini “Turkiyaning bir qismi” sifatida qo‘shib olish niyatida ekanini aytgan. U bu hududlarni Turkiyaga tarixan bog‘liq bo‘lgan hududlar deb atagan va ularni Hatay, Gaziantep va Shonliurfa kabi hududlarga qo‘shishni niyat qilganini bildirgan.

Eslatib o‘tamiz, avvalroq Erdo‘g‘an Suriyaning sobiq rahbari Bashar Asad rejimini fashizm deb atab, Turkiyada yashayotgan qochqinlar endi bemalol va qo‘rquvsiz uylariga qaytishi mumkinligini ta’kidlagandi. Shuningdek, Erdo‘g‘an Suriyada kechayotgan vaziyatni kuzatib borayotgani, “siyosiy aql” bilan tahlil qilayotgani, kelajakda ham Suriya uchun qo‘lidan kelgan ishni amalga oshirishini bildirgandi.