Erdo‘g‘an Finlyandiyaning NATOga qo‘shilish imkoniyatini ko‘rib chiqishga tayyorligini bildirdi

Turkiya Prezidenti Rajab Toyib Erdo‘g‘an NATO bosh kotibi Yens Stoltenbergga Finlyandiyaning ittifoqqa kirish ehtimolini alohida ko‘rib chiqishga tayyorligini ma’lum qildi. Bu haqda Turkiya tashqi ishlar vaziri Mavlud Chavusho‘g‘liga tayanib, TASS ma’lum qildi.

“Shvetsiyada Qurdiston ishchilar partiyasi propagandasi davom etmoqda. Uch tomonlama memorandumda kim qanday qadam tashlashi kerakligi aniq ko‘rsatilgan. O‘tgan hafta Prezident Erdo‘g‘an Stoltenbergga Finlyandiyaning NATOga a’zoligi masalasida boshqacha pozitsiyada bo‘lishimiz mumkinligini aytdi”, deydi diplomat.

Avvalroq Finlyandiya mudofaa vaziri Mikko Savola Shvetsiyani kutmasdan, davlat NATOga kirishga tayyorligini aytgan edi. Jurnalistning Finlyandiya Turkiya Shvetsiyani harbiy ittifoqqa qo‘shilishiga to‘sqinlik qilsa, uni kutadimi degan savoliga siyosatchi salbiy javob berdi: 

“Yo‘q. Bunday holda biz NATOga a’zo bo‘lamiz”.

Finlyandiya va Shvetsiya 2022 yil may oyida birgalikda NATOga a’zo bo‘lish uchun ariza topshirgan. Mamlakatlar bir vaqtning o‘zida ittifoqqa qo‘shilish istagi borligini e’lon qildi, ammo Shvetsiyada Qur’onni yoqish bilan bog‘liq harakatlar tufayli Turkiya Prezidenti Rajab Toyib Erdo‘g‘an davlatlarga faqat alohida a’zo bo‘lishlariga ruxsat berishiga shama qildi.

Eslatib o‘tamiz, Shvetsiya hukumati Turkiyada taqiqlangan Kurdiston Ishchilar partiyasiga aloqador guruhlarning Stokgolm markazida tashviqot namoyishini o‘tkazishga ruxsat bergan edi. Bundan foydalanib Daniyaning “Qattiq kelishuv” partiyasi rahbari Rasmus Paludan Qur’onni yoqib yuborgan. Shu sababli Turkiya Tashqi ishlar vazirligi Shvetsiyani NATOga a’zolik bo‘yicha majburiyatlarini buzganlikda ayblagan edi.