Erdo‘g‘an ma’muriyati G‘arbni Turkiyani beqarorlashtirishga urinishda aybladi

Anqaraning g‘arbiy ittifoqchilari terrorchilarni qo‘llab-quvvatlab, Turkiyani to‘g‘ridan-to‘g‘ri va bilvosita beqarorlashtirishga harakat qilmoqda. Bu haqda kecha, 21 noyabr kuni Turkiya Prezidenti ma’muriyatining Aloqa bo‘limi rahbari Fahrettin Altun ma’lum qildi. 

“G‘arblik ittifoqchilarimiz ularni qo‘llab-quvvatlash (Anqara tomonidan terrorchi deb tan olingan tashkilotlarni qo‘llab-quvvatlash) haqida diqqat bilan va puxta o‘ylashlari kerak. Ular bevosita yoki bilvosita mamlakatimizdagi vaziyatni izdan chiqarishga harakat qilmoqda. Ularning qo‘llab-quvvatlashi esa begunoh turklarning o‘limiga olib keladi”, deydi u Twitter’dagi sahifasida. 

U, shuningdek, G‘arbning ba’zi terrorchi tashkilotlarni boshqalarga qarshi kurashishda qo‘llab-quvvatlash strategik asosga ega degan argumentlarini tanqid qildi.  

“Ularning [bunday qo‘llab-quvvatlash uchun] strategik dalillari fars (komik fokuslar bilan engil komediya)dir. Bu terrorizmga qarshi kurashning yo‘li emas. Siz boshqa terrorchilar qo‘li bilan terrorchilarga qarshi kurasha olmaysiz. Buni faqat terrorizmga qarshi kurashga sodiq bo‘lgan mamlakatlar ittifoqi orqali amalga oshirishingiz mumkin”, deydi u. 

Shu bilan birga, Altun, Turkiya ittifoqchilari yordami bilan yoki yordamisiz terroristlar qayerga qochsa va qayerga yashirinsa ham ta’qib qilishda davom etishini ta’kidladi.  

“Biz bu kurashdan voz kechmaymiz. G‘arbning o‘qitish va qurol-yarog‘ bilan ta’minlash kabi moddiy yordami bizni kurashdan yuz o‘girishga majbur qilmaydi. Terrorchilar g‘alaba qozonmaydi, va’da beramiz", deb yozadi u.  

Altun Kurdiston Ishchilar partiyasi, Demokratik ittifoq partiyasi va Xalq mudofaa kuchlari (KIP, DIP, XMK — PKK, YPG, YPD) Anqaraga tahdid solmasligiga ishontirganlarni yana bir bor o‘ylab ko‘rishga chaqirdi. Uning qayd etishicha, bu tashkilotlar 40 yildan beri Turkiya bilan urush olib bormoqda va to‘g‘ridan-to‘g‘ri tahdid bo‘lib qolmoqda. 

"G‘arbning Suriyaga nisbatan siyosati barbod bo‘ldi. Bu davlat [Turkiyaning] milliy xavfsizligiga va mintaqaga terrorchilik tahdidini qo‘yishda davom etmoqda. O‘zgarishlar zarurligi aniq, ammo Suriyadan kelib chiqayotgan terrorizmga qarshi kurashimiz nima bo‘lishidan qat’i nazar davom etadi. Biz murosaga bormaymiz”, deydi Altun. 

Joriy yilning 20 noyabr kuni Turkiya bilan chegaradosh Onjupinar shahri o‘qqa tutildi, Turkiya xavfsizlik xizmatining uch xodimi yaralandi. Turkiya ommaviy axborot vositalari hujumlarda KIP va XMKni aybladi, bu esa 20 noyabr kuni Turkiyaning Suriya va Iroqdagi yangi havo operatsiyasiga javob berishi mumkin bo‘lgan "Panjali qilich" operatsiyasiga sabab bo‘ldi. Unda 50 dan ortiq samolyot va 20 ta dron ishtirok etdi. 21 noyabr kuni Turkiyaning Karqamish shahrida kamida beshta raketa portladi, snaryadlar litsey va turar-joy binolariga tushdi. Uch kishi halok bo‘ldi, ulardan biri bola.