Endi Senat Raisi ikki martadan ko‘p saylanishi mumkin emas  

Bugun, 19 fevral kuni "O‘zbekiston Respublikasi Oliy Majlisining Senati to‘g‘risida"gi Konstitutsiyaviy Qonunga o‘zgartirish kiritildi.

Unga ko‘ra, Senat a’zolari (senatorlar) Qoraqalpog‘iston Respublikasi Jo‘qorg‘i Kengesi, viloyatlar, tumanlar va shaharlar davlat hokimiyati vakillik organlari deputatlarining tegishli qo‘shma majlislarida mazkur deputatlar orasidan yashirin ovoz berish yo‘li bilan Qoraqalpog‘iston Respublikasi, viloyatlar va Toshkent shahridan teng miqdorda – to‘rt kishidan saylanadi.

Shuningdek, Senatning to‘qqiz nafar a’zosi fan, san’at, adabiyot, ishlab chiqarish sohasida hamda davlat va jamiyat faoliyatining boshqa tarmoqlarida katta amaliy tajribaga ega bo‘lgan hamda alohida xizmat ko‘rsatgan eng obro‘li fuqarolar orasidan Prezident tomonidan tayinlanadi.

 Bundan tashqari, Senat va uning organlari majlislarida Markaziy bank boshqaruvi raisi ishtirok etishi mumkinligi belgilandi.

Qonunda shuningdek, ayni bir shaxs surunkasiga ikki muddatdan ortiq Senat Raisi bo‘lishi mumkin emasligi ham belgilab qo‘yildi.

Senat Konstitutsiyaga muvofiq qonunchilik takliflarini qonunchilik tashabbusi tartibida Qonunchilik palatasiga kiritishga haqli.

Qonunchilik takliflarini tayyorlash, ko‘rib chiqish va ularni Qonunchilik palatasiga kiritish tartibi Senatining Reglamentida belgilanadi.

Qonun rasmiy e’lon qilingan kundan e’tiboran kuchga kiradi.

Sarvar Xurramov