Duranglar kuni. Eron va Yangi Zelandiya ham durang o‘ynadi

Bugun, 16 iyun kuni 2026 yilgi Jahon chempionatining “G” guruhidan o‘rin olgan Eron va Yangi Zelandiya terma jamoalari o‘rtasidagi uchrashuv yakunlandi. Bahsda 2:2 hisobidagi durang natija qayd etildi.

AQSHning Inglvud shahridagi “SoFay” stadionida bo‘lib o‘tgan bahsni meksikalik hakam Sesar Ramos Palasuelos boshqarib bordi. O‘yinning 7-daqiqasida Yangi Zelandiya hujumchisi Elayja Jast hisobni ochgan bo‘lsa, 33-daqiqada Eron himoyachisi Ramin Rezaian muvozanatni tikladi.

Ikkinchi bo‘limning 55-daqiqasiga kelib Jast o‘zining ikkinchi golini kiritib, Yangi Zelandiyani yana oldinga olib chiqdi. Biroq oradan ko‘p o‘tmay, 64-daqiqada  Muhammad Mohebi hisobni yana tenglashtirdi. Qolgan daqiqalarda jamoalar g‘olibni aniqlay olmadi va bahs 2:2 hisobida yakunlandi.

Ushbu natijadan so‘ng Eron va Yangi Zelandiya terma jamoalari o‘z hisoblariga bir ochkodan yozib qo‘yishdi. E’tiborli jihati, “G” guruhida 1-tur yakunlariga ko‘ra barcha to‘rtta jamoa ham bir ochkodan jamg‘arib, bir xil holatda turibdi.

Endilikda guruhning 2-turida Eron Belgiyaga qarshi maydonga tushadi, 3-turda esa Misr bilan kuch sinashadi. Yangi Zelandiya navbatdagi turda Misrga qarshi bahs olib borsa, guruh bosqichidagi so‘nggi uchrashuvini Belgiyaga qarshi o‘tkazadi.