Dunyoning eng boy odami o‘zgardi

Amerikalik biznesmen, Tesla va SpaceX asoschisi Ilon Mask o‘z rekordini yangiladi va yana dunyoning eng boy odamlari ro‘yxatida qaytadan birinchi o‘ringa chiqib oldi. Bu haqda “Bloomberg” xabar berdi.

Qayd etilishicha, Maskning boyligi 348 milliard dollarni tashkil etib, tarixiy darajaga erishgan. Nashrning 2021 yilgi statistikasida 340,4 milliard rekord ham Mask tomonidan o‘rnatilgan.

Uning boyligi oshishi biznesmenning o‘ziga tegishli bo‘lgan Tesla kompaniyasi va sun’iy intellekt bo‘yicha AI startapining muvaffaqiyati bilan bog‘liq. Qolaversa, respublikachi Donald Trampning AQSH prezidentlik saylovidagi g‘alabasi ham tadbirkorning muvaffaqiyati va uning kompaniyalari daromadining o‘sishiga katta ta’sir ko‘rsatgan.

Ro‘yxatda ikkinchi o‘rinni Amazon asoschisi Jeff Bezos  egallagan. Uning boyligi 219 milliard dollarni tashkil qiladi.

Uchinchi o‘rindan esa, Oracle asoschisi va eng yirik aksiyadori Larri Ellison joy olgan. Uning jami boyligi 206 milliard dollarga baholangan.

Eslatib o‘tamiz, oldinroq Amazon kompaniyasi asoschisi Jeff Bezos dunyoning eng boy odamlari ro‘yxatida Ilon Maskdan o‘zib ketgandi. Bezos dunyoning eng boy odamlari reytingida birinchi o‘rinni egallagandi. U sakkiz oy davomida ro‘yxatda birinchilikni hech kimga bermay kelgan Tesla, SpaceX va X ijtimoiy tarmog‘i egasi Ilon Maskni ortda qoldirgandi. Bu Tesla aksiyalari narxi bir kun avval 7 foizdan ko‘proqqa tushib ketgani bilan yuz bergan. O‘shanda Bezosning boyligi 200 milliard dollarni, Maskniki esa 198 milliard dollarni tashkil etgan.

Muhammad Hodiyev