Dunyoda koronavirus yuqtirganlar 42 milliondan oshdi

Dunyoda koronavirus infeksiyasini yuqtirib olganlar soni 42 milliondan oshib ketdi. Jons Xopkins universiteti ma’lumotiga ko‘ra, hozirda dunyoda 42 148 875 kishi COVID-19 bilan zararlanib ulgurgan.

Shuningdek, koronavirus asoratlaridan vafot etganlar soni 1 143 495 nafarga yetdi. 28 484 306 nafar bemor sog‘ayib ketgan.

Eng ko‘p kasallanish AQSH, Hindiston, Lotin Amerikasi va Yevropa, shu jumladan Rossiyada qayd etilyapti.

Koronavirus tarqalishi bo‘yicha AQSH hamon karvonboshilik qilyapti. Qo‘shma Shtatlarda 8 491 459 kishida koronavirus aniqlangan. Ularning 223 975 nafari vafot etgan va 3 375 427 nafari sog‘aygan.

Ikkinchi o‘rinda Hindiston bormoqda. Milliarddan ortiq aholiga ega Hindistonda 7 761 312 kishi COVID-19 bilan zararlangan. Ularning 117 306 nafari vafot etib, 6 948 497 nafari sog‘aygan. Sog‘ayish ko‘rsatkichi bo‘yicha mamlakat dunyoda yetakchilik qilyapti.

Faxrli uchinchi o‘rinda okeanortidagi boshqa bir davlat Braziliya joy oldi. Lotin Amerikasi mamlakatida 5 353 656 kishi koronavirusga chalingan. Bemorlarning 156 471 nafari vafot etgan va 4 526 393 nafari kasallikdan forig‘ bo‘lgan.

Rossiya koronavirus eng ko‘p tarqalgan to‘rtinchi mamlakat bo‘lib turibdi. Mamlakatda 1 471 000 kishi virusga chalingan va 1 113 736 nafar odam sog‘aygan. RFda COVID-19 dan o‘lim ko‘rsatkichi boshqalarga qaraganda ancha past. Hozirgacha 25 353 kishi virus qurboni bo‘lgan.

Keyingi o‘rinda Fransiya joylashgan. Faranglar mamlakatida 1 084 659 kishi COVID-19 ga chalingan. Bemorlarning 34 536 nafari vafot etgan. 113 636 kishi kasallikdan forig‘ bo‘lgan.

Oltinchi o‘rinda 1 069 368 kishi koronavirusga chalingan Argentina qayd etilgan. Janubiy Amerikaning ikkinchi eng yirik mamlakatida 28 338 kishi vafot etgan va 866 695 nafar bemor sog‘aygan.

Bahorda koronavirusning o‘chog‘iga aylangan Ispaniya hozirda yettinchi o‘rinda boryapti. Pireney yarimorolidagi mamlakatda 1 046 132 kishi virusga chalingan. Ularning 34 752 nafari vafot etgan. Sog‘ayganlar haqida aniq ma’lumot mavjud emas.

Sakkizinchi o‘rindagi Kolumbiyada 998 942 kishi koronavirusni yuqtirgan. Bu yerda 29 802 bemor vafot etgan va 900 mingdan ortig‘i sog‘aygan.

880 775 kishi koronavirus yuqtirgan Mekika ham dastlabki o‘ntalikka kirgan. Meksikada 88 312 kishi virus asoratlaridan vafot etgan va 740 934 kishi sog‘aygan.

Peru virus tarqalishi bo‘yicha Top-10 talik davlatlarni yakunlab bergan. Mamlakatda 879 876 kishi koronavirusga chalinib, 33 984 kishida kasallik halokatli yakunlangan. 796 719 kishi esa infeksiyadan sog‘aygan.

So‘nggi sutkada AQSH, Hindiston, Fransiya, Buyuk Britaniya, Rossiya, Italiya, Braziliya, Belgiya va Argentinada 10 mingdan ko‘p bemor aniqlangan.