Diyego Simeone Argentina terma jamoasini boshqarishi mumkin

Argentina terma jamoasi bosh murabbiyi Lionel Skaloni iste’foga chiqadigan bo‘lsa, uning o‘rnini egallashi mumkin bo‘lgan asosiy nomzodlar sifatida Diyego Simeone va Marselo Galyardo ko‘rilmoqda. Bu haqda insayder Nikolo Skira xabar berdi.

Manbaga ko‘ra, Skalonining Argentina futbol assotsiatsiyasi (AFA) bilan tuzgan amaldagi shartnomasi 2026 yil oxiriga qadar amal qiladi. Biroq murabbiy muddatidan oldin lavozimini tark etgan taqdirda, federatsiya allaqachon ehtimoliy vorislar bo‘yicha reja tayyorlab qo‘ygan.

Qayd etilishicha, hozirda klubsiz yurgan Marselo Galyardo ham nomzodlar qatorida bor. Shu bilan birga, “Atletiko Madrid” bosh murabbiyi Diyego Simeone AFA rahbariyatining eng ustuvor varianti sifatida ko‘rilmoqda.

Ma’lumot uchun, Lionel Skaloni boshchiligida Argentina terma jamoasi o‘z tarixidagi eng muvaffaqiyatli davrlardan birini o‘tkazdi. Uning qo‘l ostida jamoa Jahon chempionligini qo‘lga kiritdi, ikki marta Amerika kubogida g‘olib chiqdi va yana bir bor Jahon chempionati finaligacha yetib bordi.

Eslatib o‘tamiz, avvalroq Argentina terma jamoasining amaldagi bosh murabbiyi Lionel Skaloni Ispaniyaga qarshi Jahon chempionati finalidan so‘ng matbuot anjumanida terma jamoani 2026 yil dekabr oyigacha boshqarishini va shundan so‘ng o‘z lavozimini tark etishini aytgandi.