Britaniya neft tankeri husiylarning hujumi oqibatida yonib ketdi

Yaman husiylari Adan ko‘rfazida Britaniya neft tankeriga hujum uyushtirganini e’lon qildi. Bu haqda BBC yozmoqda.

“Adan ko‘rfazida husiylar uni raketa bilan urganlaridan keyin neft tankeri yonmoqda”, deyiladi xabarda,

Yamandagi husiylar harakati kecha kechqurun Marlin Luanda'ga zarba berganini bildirgan.

BBC'ga ma’lum qilinishicha, zarba oqibatida kemaning yuk sisternalaridan birida yong‘in kelib chiqqan va uni o‘chirishda yong‘in o‘chirish texnikasi qo‘llanilgan.

AQSH harbiylari husiylar tankerni kemaga qarshi ballistik raketa bilan urganini va dengiz floti kemalari uning favqulodda chaqiruviga javob berishini aytgan. Qurbonlar haqida ma’lumotlar yo‘q.

Tanker Marshall orollari bayrog‘ini ko‘taradi va Singapurda ro‘yxatdan o‘tgan Trafigura ko‘p millatli savdo kompaniyasi tomonidan boshqariladi.

Eslatib o‘tamiz, Amerika qo‘shinlari Yamandagi husiylarning kemaga qarshi raketasini nishonga olgandi.