Braziliyada chumoli kattaligidagi qurbaqa topildi

Braziliyada olimlar azaldan ma’lum bo‘lgan eng kichik umurtqali jonzotlardan biri – chumoli jussasi bilan teng bo‘lgan qurbaqani topdi. Bu haqda “The New York Times” xabar berdi.

Ushbu 6,95 millimetr o‘lchamdagi qurbaqa ba’zi chumoli turlaridan kichikroq va barmoq uchiga osongina joylashadi. Kampinas universiteti gerpetologi Luish Felipe Toledo va uning hamkasblari “PeerJ” jurnalida chop etilgan tadqiqotda qurbaqani tasvirlab, uni Brachycephalus dacnis deb nomladi.

Toledo bunday qurbaqa borligi haqida birinchi marta hamkasbi Braziliyaning Atlantika o‘rmonida yig‘ilgan miniatyura qurbaqalarining audioga yozib olingan qo‘ng‘iroqqa o‘xshash ovozini unga eshittirganda bilgan. Yozuvlarni eshitgan Toledo darhol yangi narsa bilan shug‘ullanayotganini anglab yetgan.

Braziliya o‘rmonlarida Brachycephalus turiga mansub ko‘plab qurbaqalar mavjud, ular “egar qurbaqalari” deb ham ataladi. Ular o‘z o‘lchamidan 30 marta kattaroq masofaga sakrashga qodir, shuning uchun aholi ularni ko‘pincha “burga qurbaqalari” deb ham ataydi.

Brachycephalus’ning turlari juda o‘xshash va ularni faqat tashqi ko‘rinishi bilangina farqlab bo‘lmaydi. Biroq, olimlar har bir turning urg‘ochilarga to‘g‘ri erkakni tanlashga yordam beradigan o‘ziga xos juftlashtirish ishlarini yo‘lga qo‘ygan.

Yangi topilgan qurbaqaning tovushlari yumshoq, qisqa notalar va qurbaqaga qaraganda ko‘proq kriketga o‘xshaydi. DNK testlari ham Brachycephalus dacnis’ning genetik jihatdan boshqa turlardan farq qilishini tasdiqlagan.

Toledo jamoasi bunday kichik o‘lcham uning tuzilishiga qanday ta’sir qilishini o‘rganish uchun qurbaqani batafsil skanerdan o‘tkazgan. Masalan, uning old panjalarida atigi ikkita va orqa panjalarida uchta barmog‘i bor, ba’zi ichki organlar, xususan, qulog‘ining bir qismi yo‘q.

Oddiy qurbaqalardan farqli o‘laroq, Brachycephalus dacnis amfibiyalar uchun odatiy metamorfoz bosqichidan o‘tmaydi – u har bir siklda faqat ikkita tuxum qo‘yadi.

Ilgari eng kichik umurtqali hayvonlarning rekord uzunligi 7 millimetr bo‘lgan Yangi Gvineya qurbaqasiga tegishli edi.

Eslatib o‘tamiz, avvalroq Avstraliyaning shimoli-sharqidagi bog‘dan og‘irligi 2,7 kilogrammga yaqin bo‘lgan qurbaqa topilgandi. “Toadzilla” nomini olgan qurbaqa “Konvey” milliy bog‘ida park xodimlari tomonidan topilgan. Urg‘ochi qurbaqa kattaligi bo‘yicha hozirgacha aniqlangan qurbaqalar orasida eng yirigi bo‘lmoqda. O‘sha paytgacha eng katta qurbaqa og‘irligi 2,65 kilogramm bo‘lgan Shvetsiyadagi Prinsen nomli qurbaqa bo‘lib, 1991 yilda Ginnesning rekordlar kitobiga kirgandi.