Blinken Venesuelada prezidentlik vakolatlarini muxolifat vakiliga topshirishga chaqirdi

Vashington ma’muriyatining fikricha, Venesueladagi siyosiy kuchlar prezidentlik vakolatlarini muxolifat yetakchilaridan biri Edmundo Gonsalesga topshirish masalasini muhokama qilishni boshlash vaqti kelgan. Bu versiya AQSH Davlat kotibi Entoni Blinkenning kecha, 1 avgust kuni e’lon qilgan bayonotida keltirilgan.

Amerika tashqi siyosat departamenti rahbari quyidagi bayonot bilan chiqdi:

“Ko‘p dalillarni hisobga olsak, AQSH va eng muhimi venesuelaliklar uchun Edmundo Gonsales Venesuelada 28 iyulda bo‘lib o‘tgan prezidentlik saylovlarida eng ko‘p ovoz olgani aniq. Biz Edmundo Gonsalesni muvaffaqiyatli kampaniya bilan tabriklaymiz. Endi Venesueladagi partiyalar Venesuela saylov qonunlari va venesuelaliklarning xohish-istaklariga muvofiq hokimiyatni hurmatli, tinch yo‘l bilan topshirishni muhokama qilishni boshlash vaqti keldi. Biz Venesuelada demokratik normalarning tiklanishini to‘liq qo‘llab-quvvatlaymiz va xorijiy hamkorlarimiz bilan birgalikda ularni mustahkamlash imkoniyatlarini ko‘rib chiqishga tayyormiz”, deydi Blinken.

AQSH Davlat kotibining G‘arbiy yarimshar masalalari bo‘yicha yordamchisi Brayan Nikols ham 31 iyul kuni Vashington ma’muriyati boshqa davlatlar Gonsalesni Venesueladagi prezidentlik saylovlari g‘olibi sifatida tan olishi kerak, deb hisoblashini aytgan.

O‘z navbatida, Venesuela Oliy sudining Saylov palatasi 28 iyul kuni bo‘lib o‘tadigan saylovda prezidentlik uchun kurashayotgan barcha siyosatchilarni saylov protokollarini tekshirishda ishtirok etish uchun 2 avgust kuni sud binosiga kelishga taklif qildi.

Ma’lumot uchun, Venesuelada joriy yilning 28 iyul kuni bo‘lib o‘tgan saylovda amaldagi Prezident Nikolas Maduro g‘olib deb e’lon qilindi, biroq saylov idoralari bu da’voni tasdiqlash uchun batafsil natijalarni oshkor eta olmadi. Natija ko‘pchilik tomonidan so‘roq ostida qoldi, AQSH va Yevropa Ittifoqi Venesuela hukumatidan ovoz berish haqidagi batafsil ma’lumotlarni oshkor qilishni talab qilmoqda.

Eslatib o‘tamiz, 29 iyul kuni amaldagi Prezident Nikolas Maduroning prezidentlik saylovlarida g‘alaba qozongani e’lon qilinganidan keyin Venesuelada namoyishchilar butun mamlakat bo‘ylab shahar ko‘chalarida, shuningdek, Milliy saylov organlarining ofislarida to‘plangandi.