Blinken Ozarbayjonga bosim o‘tkazayotganini tan oldi

AQSH Davlat kotibi Entoni Blinken Ozarbayjon va Armaniston yaqin orada tinchlik kelishuviga erishishi mumkin, deb hisoblaydi.  U Kongress Senatining Tashqi ishlar qo‘mitasidagi tinglovda so‘zga chiqib, buni tasdiqladi. 

"Va menimcha, imkoniyat bor, uni bo‘rttirib aytmoqchi emasman, balki tinchlik bitimini tayyorlashni amalda yakunlash imkoniyati bor", deydi Amerika Tashqi idorasi rahbari Vashingtonning Baku va Yerevan o‘rtasidagi munosabatlarni normallashtirishga qaratilgan urinishlarni sharhlab. 

U joriy yil boshida Ozarbayjon Prezidenti Ilhom Aliyev va Armaniston Bosh vaziri Nikol Pashinyan bilan Myunxenda xavfsizlik bo‘yicha konferensiyada uchrashganini esladi. 

"[Ozarbayjon va Armaniston] tashqi ishlar vazirlari yaqinda Vashingtonda bo‘lgan edi. Ular qaytib kelishlarini kutaman. Biz  [kelishuv] matni ustida ishlamoqdamiz”, deydi Blinken. 

Amerika diplomatiyasi rahbarining so‘zlariga ko‘ra, u Ozarbayjon va Armaniston o‘rtasidagi kelishuv masalasi, Baku va Yerevan o‘rtasidagi munosabatlarni normallashtiradigan tinchlik kelishuviga erishish, shuningdek, (tan olinmagan) Tog‘li Qorabog‘dagi etnik armanlarning huquqlari va himoyasi, chegaralarni delimitatsiya qilish masalalari va hokazolar bilan faol shug‘ullanmoqda. 

"Biz buni Armanistonga yuklamaymiz. Biz Armaniston tomonidan bildirilgan kuchli istaklarga javob beramiz. Biz ko‘rishni istaganlarga 30 yildan ortiq davom etgan mojaroga hech bo‘lmaganda katta darajada barham beradigan kelishuvga erishishga yordam bera olamizmi yoki yo‘qligini ko‘rsatamiz", deydi Blinken. 

Shu bilan birga, u Lochin yo‘lagidagi muammolarni ham tilga oldi.  

"Men Ozarbayjonga, shu jumladan shu haftada ham ushbu yo‘lakni qayta ochish uchun bosim o‘tkazyapman. Biz bu borada ishlayapmiz", deydi Davlat kotibi. 

U, mubolag‘asiz, hozirda Armaniston, shuningdek, Ozarbayjon manfaatlariga chuqur javob beradigan qulay imkoniyat borligiga ishonishini aytgan. 

Qorabog‘ urushi 

2020 yil 14 iyul kuni Ozarbayjon-Armaniston chegarasida ro‘y bergan to‘qnashuvda Ozarbayjon armiyasining bir general-mayori boshliq 7 nafar askarning shahid bo‘lishi Qorabog‘ning ozod qilinishiga olib kelgan operatsiyaning boshlanishi bo‘ldi. 27 sentyabr kuni Armaniston qo‘shinlari Tog‘li Qorabog‘ yaqinidagi tinch aholi punktlariga o‘t ochdi, Ozarbayjon o‘z yerlarini ishg‘oldan ozod qilish uchun “Qasos” qarshi hujumini boshladi, natijada bosib olingan yerlar birin-ketin ozod qilindi.

2020 yilning 9 noyabridan 10 noyabrga o‘tar kechasi “Tog‘li Qorabog‘da o‘t ochishni to‘xtatish haqida”gi bayonot imzolandi. Urush yakunlariga ko‘ra, Turkiya qo‘llovidagi Ozarbayjon g‘alaba qildi. Rossiyaning yordamiga umid qilgan Armaniston esa mag‘lubiyatga yuz tutdi.

44 kunlik urush yakunlariga ko‘ra, Ozarbayjon armiyasi mamlakatning 5 shahri, 4 ta posyolka va 286 ta qishlog‘ini arman bosqinchilaridan ozod qildi. Ozarbayjon Qurolli Kuchlarining 2,9 mingdan ortiq harbiy xizmatchisi o‘z ona yurtlarini ozod qilish uchun kurashda halok bo‘ldi.