Belarusda terrorizmga qarshi operatsiya rejimi joriy etildi

Belarusda ba’zi qo‘shni davlatlar tomonidan ehtimoliy provokatsiyalar haqida xabarlar paydo bo‘lgandan so‘ng, aksilterror operatsiyasi rejimi joriy etildi. Bu haqda respublika Tashqi ishlar vazirligi rahbari Vladimir Makey “Izvestiya” gazetasiga bergan intervyusida aytib o‘tdi.

“Bugun, afsuski, dunyo shu qadar oldindan aytib bo‘lmaydigan bo‘lib qoldiki, biz hech kimga ishonolmaymiz. Shuning uchun biz o‘z xavfsizligimiz haqida qayg‘urishimiz, Belarus Prezidenti aytganidek, xalqimizni himoya qilishimiz va bosqinchilarning oyog‘i yerimizning bir metriga ham qadam bosmasligiga ishonch hosil qilishimiz kerak”, deydi Makey.

Vazirning ta’kidlashicha, Belarus fuqarosi Aleksandr Lukashenko huquq-tartibot idoralari bilan bir necha uchrashuvlar o‘tkazgan.

“Antiterror operatsiyasi rejimi joriy etildi. Darhaqiqat, ba’zi qo‘shni davlatlar Belarus hududining ayrim qismlarini egallab olish bilan bog‘liq provokatsiyalarni rejalashtirayotgani haqida ma’lumotlar bor edi”, deydi TIV rahbari.

Makeyning so‘zlariga ko‘ra, bunday vaziyatda birorta ham signal javobsiz qolmasligi kerak. Uning qayd etishicha, respublika Qurolli Kuchlari, huquq-tartibot tuzilmalari va maxsus xizmatlar “qo‘shni davlatlar tomonidan yuzaga kelishi mumkin bo‘lgan har qanday provokatsiyani qaytarishga qodir”.

Eslatib o‘tamiz, 10 oktyabr kuni Lukashenko Rossiya Prezidenti Vladimir Putin bilan "Ittifoq davlatining g‘arbiy chegaralarida vaziyatning keskinlashuvi munosabati bilan" qo‘shma mintaqaviy qo‘shinlar guruhini joylashtirish bo‘yicha kelishib olganini ma’lum qildi. U, shuningdek, Ukraina Belarus hududiga zarba berishni rejalashtirayotganini iddao qildi. Kiyev bu ayblovni mutlaqo rad etdi.