Bayram kunlari O‘zbekistonga Volgabo‘yidan salqin havo oqimi kiradi

30 va 31 avgust kunlari O‘zbekistonda yog‘ingarchilik bo‘lmaydi. 31 avgustda Volgabo‘yi hududidan nisbatan nam va salqin havo oqimi kirishi natijasida ob-havo o‘zgaradi. Bu haqda Gidrometeorologiya xizmati markazi xabar berdi.

Respublika bo‘yicha bulutlilikning ortishi, ob-havoning yog‘ingarchiliksiz bo‘lishi kutilmoqda, faqat Toshkent viloyatining ayrim joylarida qisqa muddatli yomg‘ir yog‘ishi, momaqaldiroq bo‘lishi mumkin.

Kunduzgi harorat 1-2 darajaga pasayadi va +28…+33 daraja atrofida bo‘ladi. Sentyabr oyining ilk kunlari ob-havo asosan yog‘ingarchiliksiz bo‘ladi. Harorat kechasi 15…+20, kunduzi +30…+35 daraja atrofida bo‘ladi.

Respublikaning tog‘li va tog‘oldi tumanlarida 30-31 avgust va 1-2 sentyabr kunlari qisqa muddatli yomg‘ir yog‘ishi va momaqaldiroq bo‘lishi mumkin.

Qayd etilishicha, O‘zbekistonda sentyabrda, ayniqsa uning birinchi yarmida ob-havo odatda issiq va kam bulutli bo‘ladi.

Qisqa muddatli yomg‘ir faqat ayrim kunlarda ko‘proq tog‘li va tog‘oldi hududlarda kuzatilishi mumkin. Tungi harorat +15…+20 daraja atrofida bo‘ladi, kunduzi +25…+30 darajadan +32…+37 darajagacha o‘zgarib turadi.