Bayden va Zelenskiy Rossiyaga qarshi sanksiyalarni muhokama qildi

AQSH Prezidenti Jo Bayden va Ukraina Prezidenti Vladimir Zelenskiy kecha, 10 yanvar kuni Vashingtonning Ukrainani qo‘llab-quvvatlashi, AQSHning Rossiyaga qarshi yangi sanksiyalari va Ukraina havo mudofaasini kuchaytirish masalalarini muhokama qildi. Bu haqda ikki davlat rahbarlarining matbuot xizmatlari xabar berdi.

Bayden Zelenskiyga AQSHning Ukrainani qo‘llab-quvvatlashni kuchaytirish va Rossiyaga nisbatan pozitsiyasini mustahkamlash borasidagi sa’y-harakatlari haqida ma’lumot berdi.

"So‘nggi bir necha oy ichida Qo‘shma Shtatlar o‘z ozodligini Rossiya tajovuzidan himoya qilayotgan Ukraina qo‘shinlariga yuz minglab artilleriya snaryadlari, minglab raketalar, yuzlab zirhli texnika va boshqa muhim jihozlarni yetkazib berdi. Bugun Qo‘shma Shtatlar Rossiya energetika sektoriga qarshi keng qamrovli sanksiyalar paketini e’lon qildi, bu Qo‘shma Shtatlar Rossiya iqtisodiyotiga 2022 yildan beri joriy qilgan misli ko‘rilmagan sanksiyalar rejimini to‘ldiradi", deyiladi Oq uy bayonotida.

Bayonotda, shuningdek, Bayden “Ukraina xalqi o‘zi munosib bo‘lgan adolatli va mustahkam tinchlikni ta’minlashi uchun Ukrainani erkinlik uchun kurashda qo‘llab-quvvatlashni davom ettirish muhimligini” ta’kidlagani qayd etilgan.

"Ukraina masalasida G‘arbiy Yevropa birligini qo‘llab-quvvatlashda davom etar ekanmiz, ukrainaliklarning g‘alaba qozonishi uchun real imkoniyat bor, chunki Rossiya uchun xarajat nihoyatda yuqori. Putin hozir qiyin ahvolda, unga hech qanday muhlat bermaslik juda muhim. Uning ham iqtisodiy, ham siyosiy jihatdan o‘ziga xos muammolari, jiddiy muammolari bor. Va shuning uchun men Ukrainaga ustunlik berish uchun qo‘limdan kelgan hamma narsani qilishga qaror qildim", dedi Bayden.

Zelenskiy Baydenga Vashingtonning qo‘llovi va “Qo‘shma Shtatlarning xalqaro hamjamiyatni birlashtirishdagi muhim roli” uchun minnatdorchilik bildirdi. Zelenskiyning so‘zlariga ko‘ra, Prezidentlar AQSHning Rossiyaning soya tankerlari floti va “shaxsan Putin uchun pul to‘playdigan” Rossiya energetika sektori kompaniyalariga qarshi yangi sanksiyalarini ham muhokama qilgan.

"U hamyonlarini bo‘shatib, urushining narxini his qilishi kerak. Men Amerikadan, har ikki partiyadan, Kongressning har ikki palatasidan Rossiyaga asossiz va jinoiy tajovuz uchun mutlaqo adolatli bosimni qo‘llab-quvvatlayotganidan minnatdorman", dedi Zelenskiy.

Zelenskiyning aytishicha, u Bayden bilan Ukrainaning “havo qalqoni”ni mustahkamlashda davom etish, “Ukraina shaharlari va qishloqlaridagi hayotni Rossiya terroridan – Rossiya raketalari va uchuvchisiz samolyotlarining kundalik zarbalaridan himoya qilish” zarurligini muhokama qilgan. Uning so‘zlariga ko‘ra, AQSH tomonidan yetkazib berilgan Patriot raketalari “o‘z samaradorligini isbotlagan” va shuning uchun kuchlar “ko‘paytirilishi kerak”.