Bayden Xitoy investitsiyalarini chekladi

Prezident Jo Bayden kecha, 9 avgust kuni AQSHning Xitoyga kompyuter chiplari singari yuqori texnologiyalarga sarmoya kiritishini taqiqlovchi va boshqa yo‘nalishlarda hukumat xabarnomasini talab qiladigan buyruqni imzoladi. Bu haqda “Reuters” nashri xabar berdi.

Ushbu buyruq AQSH Moliya kotibiga Xitoy sub’ektlariga yarimo‘tkazgichlar, mikroelektronika, kvant axborot texnologiyalari va ba’zi sun’iy intellekt tizimlariga investitsiyalarni taqiqlash yoki cheklash huquqini beradi.

Buyruq Amerika kapitalining mamlakat milliy xavfsizligiga putur yetkazadigan texnologiyalarni ishlab chiqish uchun sarflanishiga yo‘l qo‘ymaslikka qaratilgan. 

“Uzoq vaqt davomida Amerika pullari Xitoy harbiylarining o‘sishiga yordam berdi. Bugun Amerika qo‘shma Shtatlari mamlakat sarmoyasini ta’minlash uchun strategik birinchi qadamni tashlamoqda”, dedi Senatning demokratik rahbari Chak Shumer.

Xitoy tomon esa, tabiiyki, bunga yaxshi munosabaat bildirmadi.

“Buyruq korxonalarning normal ishlashi va qaror qabul qilishiga ta’sir qiladi. Xalqaro iqtisodiyotga va savdo tartibiga putur yetkazadi”, deyiladi Xitoy savdo vazirligining bayonotida.

Keltirilishicha, bu harakat dunyoning ikki yirik iqtisodiyoti o‘rtasidagi keskinlikni kuchaytirishi mumkin. Vashingtondagi Xitoy elchixonasi bu choradan “juda hafsalasi pir bo‘lgani”ni aytdi.

Eslatib o‘tamiz, Xitoy nemis texnologiyasidan foydalanish imkoniyatini kengaytirish uchun litsenziyalardan foydalanmoqda.