Bayden Isroilga yetib bordi (video)

Bugun, 18 oktyabr kuni AQSH Prezidenti Jo Bayden Isroilga yetib bordi. Bu haqda “The Times of Israel” xabar berdi.

Qayd etilishicha, Amerika yetakchisining samolyoti mahalliy vaqt bilan soat 10:50 atrofida Ben Gurion aeroportiga qo‘ngan. Baydenni aeroportda Isroil Bosh vaziri Benyamin Netanyaxu va Prezident Isaak Gersog kutib olgan.

Ma’lumotlarga ko‘ra, Amerika yetakchisi oila a’zolari HAMAS jangarilari qo‘lida asirlikda bo‘lgan amerikaliklar bilan uchrashishni rejalashtirgan. 

Shuningdek, Baydenning jamoasi o‘zini va erini garovda ushlab turgan besh qurolli odamni ovqatlantirib, maxsus kuchlar guruhi yaqinlashgunga qadar 19 soat davomida ular bilan gaplashib, chalg‘itgan Reychel Ederi bilan ko‘rishishni so‘ragan.

Eslatib o‘tamiz, Bayden Ammanda Iordaniya qiroli Abdulla II, Misr Prezidenti Abdulfattoh as-Sisi va Falastin rahbari Mahmud Abbos bilan birgalikda to‘rt tomonlama uchrashuv o‘tkazishi kerak edi. Biroq G‘azodagi shifoxonaga qilingan hujumdan so‘ng Bayden Iordaniyaga safarini bekor qildi.