Bayden AQSH va NATO Ukrainani himoya qilishga majbur emasligini aytdi

Amerika Prezidenti Jo Baydenning aytishicha, harbiy to‘qnashuv boshlangan taqdirda AQSH va NATO Ukrainani himoya qilish uchun harbiy kuch ishlatishga majbur emas.

“5-modda (jamoaviy mudofaa) bo‘yicha biz NATOdagi ittifoqchilarimizga hujum qilingan taqdirda ularga nisbatan ma’naviy va huquqiy majburiyatimiz bor. Bu muqaddas majburiyatdir. Bu majburiyat ... Ukrainaga taalluqli emas”, degan Bayden.

Bayden Ukrainani himoya qilish uchun Amerika qo‘shinlaridan bir tomonlama foydalanish imkoniyati kun tartibida emasligini qo‘shimcha qildi.

NATO bosh kotibi Yens Stoltenberg avvalroq Kiyev alyans a’zosi emasligini, shuning uchun uning a’zolari kabi xavfsizlik kafolatlariga ega emasligini bildirgan edi.

Ma’lumot o‘rnida, G‘arb matbuoti va siyosatchilari so‘nggi paytlarda Moskva Ukraina bilan chegarada qo‘shinlarini jamlayotganini ta’kidlab kelmoqda. Putinning matbuot kotibi Dmitriy Peskov Rossiya o‘z qurolli kuchlarini o‘z hududi va o‘z xohishiga ko‘ra ko‘chirayotganini, uning harakatlari hech kimga tahdid solmasligini va hech kimni bezovta qilmasligi kerakligini aytib kelmoqda. Moskvaning ta’kidlashicha, “Rossiya tajovuzkorligi” haqidagi xabarlar chegara hududlarida NATO kuchlarini to‘plash uchun bahona sifatida foydalanilmoqda.

Germaniyaning “Bild” gazetasi hatto Rossiya Ukrainaga bostirib kirish uchun ikkita hujum rejasini ishlab chiqqani haqida xabarlar tarqatdi. Nemis nashri hujum 2022 yil boshida amalga oshirilishiga ishonch bildirgan.