Bashar Asad Rossiyaga 4 ta samolyotda nimalarni olib qochgani ma’lum bo‘ldi

Suriyaning hokimiyatdan ag‘darilgan prezidenti Bashar Asad Rossiyaga qochganida o‘zi bilan to‘rtta samolyotda pul va qimmatbaho buyumlarni olib ketgan. Bu haqda “Reuters” xabar bermoqda. 

Qayd etilishicha, Suriya sobiq rahbarini evakuatsiya qilish bo‘yicha maxsus operatsiya davomida 500 ming dollarga yaqin naqd pul, tasviriy san’at namunalari, muhim hujjatlar, shuningdek, maxfiy ma’lumotlarga ega noutbuklar va qattiq disklar olib chiqilgan. 

Agentlik ma’lumotlariga ko‘ra, evakuatsiya Embraer Legacy 600 samolyotida amalga oshirilgan. Parvozlarni kuzatish tizimiga ko‘ra, Asad rejimi qulashidan ikki kun avval avialayner Damashq va Abu-Dabi o‘rtasida bir necha parvozlarni amalga oshirgan. 

O‘tgan yilning 6 dekabr kuni samolyot Bashar Asad oilasi a’zolari bilan pul, tasviriy san’at va haykaltaroshlik buyumlarini olib, ikki marta parvoz qilgan. 7 dekabr kungi reysda banknotalar bilan to‘ldirilgan qora sumkalar, shuningdek, moliyaviy hisobotlar, korporativ va ko‘chmas mulk ma’lumotlari, bank o‘tkazmalari va offshor hisoblari haqidagi ma’lumotlarni o‘z ichiga olgan elektron qurilmalar olib ketilgan. 

Eslatib o‘tamiz, 2024 yil 8 dekabrga o‘tar kechasi Suriyada Bashar Asad rejimi qulagan edi. Qo‘zg‘olonchilar hokimiyatni qo‘lga kiritdi, prezident saroyiga kirib bordi, davlat televideniyesi voqea joyidan darhol jonli efirga chiqdi. Jangarilar minglab odamlarni, jumladan, barcha siyosiy mahbuslarni qamoqxonadan ozod qildi. Armiya taslim bo‘lganligini e’lon qildi. Tutilgan Prezident Suriyani tark etdi. 9 dekabr kuni Bashar Asad va uning oilasi Moskvada ekani ma’lum bo‘ldi. 

2025 yil mart oyida Suriyaning muvaqqat rahbari Ahmad ash-Shara Rossiya rahbaridan Bashar Asadni sudga topshirishni talab qildi.