“Barselona” murabbiyligi uchun asosiy nomzod ma’lum bo‘ldi

“Barselona” klub bosh murabbiyi lavozimiga munosib nomzodni izlashda davom etmoqda. Bu haqda AS xabar berdi.

Manbaga ko‘ra, “Barselona” mos ravishda PSJ va “Arsenal” bilan shartnoma imzolagan Luis Enrike yoki Mikel Artetani murabbiylikka olib kelishni deyarli imkonsiz deb hisoblamoqda. Mavsum oxirida “Liverpul”ni tark etadigan Yurgen Klopp katta ehtimol bilan bir muddat ta’tilda bo‘ladi.

Hozirda “Barselona” germaniyalik Xans-Diter Flikni murabbiylikka tayinlash variantini ko‘rib chiqmoqda, biroq u klub rahbariyatida ishonch uyg‘otmayapti. Kataloniya klubi rahbariyati bu lavozimga asosiy nomzod sifatida “Brayton” ustozi Roberto De Zerbini ko‘rmoqda.

Kataloniya klubi De Zerbini taktik jihatdan yetuk murabbiy deb biladi, uning futbol g‘oyasi “Barselona”ning an’anaviy qadriyatlariga mos tushishiga ishonmoqda.

Qayd etish joiz, “Barselona”ning amaldagi bosh murabbiyi Xavi mavsum yakunida o‘z lavozimini tark etishi xabar qilingandi.