“Barselona” Messini o‘z safiga qo‘shib olish bo‘yicha muhim qadamlarni tashlamoqda

Ispaniyaning “Barselona” klubi PSJ hujumchisi Lionel Messini jamoaga qaytarish choralarini ko‘rmoqda. Bu haqda “Marca” nashri xabar berdi.

Manbaga ko‘ra, klub argentinalik hujumchining Kataloniyaga qaytishi uchun muhim qadamlarni qo‘ygan. Qadamlardan biri himoyachi Jerar Pikening ketishi edi. So‘ngi yillarda Messi va Pikening munosabatlarida sovuqchilik kuzatilgandi. 

Qayd etilishicha, Messi Pikening klubdan ketishida faol ishtirok etgan. “Barselona” shuningdek, Serxio Buskets va Xordi Alba bilan shartnomani uzaytirmoqchi.

Argentinalik hujumchi joriy mavsum Fransiya chempionatida 25 ta o‘yinda maydonga tushib, 14 ta gol urdi va 14 ta golli uzatmani amalga oshirdi.

Eslatib o‘tamiz, avvalroq Messi PSJ bilan yangi shartnoma imzolashdan bosh tortgani va “Barselona”ga o‘tish variantiga qiziqayotgani haqida xabar berilgandi, biroq hozircha Kataloniya klubi argentinalik hujumchi bo‘yicha PSJga rasmiy taklif bilan chiqqani yo‘q.