“Barselona” hali ham Messiga maosh to‘layaptimi?

Kataloniyaning “Barselona” klubi 2021 yilda jamoadan ketgan argentinalik futbolchi Lionel Messiga haligacha maosh to‘lamoqda. Bu haqda klub prezidenti Joan Laporta ma’lum qildi.

Unga ko‘ra, kataloniyaliklar futbolchiga hozirda rekonstruksiya qilinayotgan “Kamp Nou” stadionining ochilish marosimiga qadar oylik maosh to‘lashda davom etadi. 

“Messi “Barselona”dan shu vaqtgacha ham oyma-oy maosh olib kelmoqda. Biz uning jamoa bilan rasman xayrlashishini xohlardik. Bu “Kamp Nou”ning ochilish marosimiga qadar bo‘lsa xursand bo‘lardim. Shu hisobda Messi 2025 yilga qadar klubdan maosh olishda davom etadi”, deydi Joan Laporta.

Biroq klub prezidenti futbolchiga aynan nima sababdan hanuz pul berib kelinayotganini izohlamagan.

Ma’lumot uchun, Messi 2021 yilning avgustida shartnomadagi qiyinchiliklar tufayli “Barselona”ni tark etishga majbur bo‘ldi. Keynchalik u ikki yil PSJda safida o‘ynadi va 2022/2023 yilgi mavsum yakunida AQSHning “Inter Mayami” klubiga o‘tdi.