Belsa Urugvay bosh murabbiyligidan ketdi

Urugvay terma jamoasi bosh murabbiyi Marselo Belsa jamoaning 2026 yilgi Jahon chempionatida guruh bosqichidan keyingi bosqichlarga chiqa olmagani uchun, o‘z lavozimini tark etishini ma’lum qildi. Bu haqda mamlakat futbol assotsiatsiyasi xabar berdi.

Matbuot anjumanida so‘zga chiqqan mutaxassis natija uchun to‘liq mas’uliyatni o‘z zimmasiga oldi.

“Mening mas’uliyatim juda aniq. Yakuniy natijamizni oqlay olmayman. Xulosa qilib aytganda, ixtiyorimdagi resurslardan to‘g‘ri foydalana olmadim. Bu yerda futbolchilarning sifati haqida gap ketyapti. Biz qo‘limizdan kelgan barcha ishni qildik, ammo bu yetarli bo‘lmadi”, deydi Belsa.

Ma’lumot uchun, Urugvay terma jamoasi Jahon chempionatining “H” guruhi 3-turida Ispaniyaga 0:1 hisobida mag‘lub bo‘ldi.

Shu tariqa, Urugvay ikki ochko bilan guruhda uchinchi o‘rinni egalladi va pley-off bosqichiga chiqish imkoniyatini qo‘ldan boy berdi.

Jamoa darvozaboni Fernando Muslera guruh bosqichidagi o‘yinlarda bir nechta xatolarga yo‘l qo‘ydi va Ispaniyaga qarshi bahsda tanaffus paytida almashtirildi.

Ma’lumot uchun, 70 yoshli Belsa 2023 yilning may oyidan buyon Urugvay terma jamoasini boshqarib kelayotgandi. Uning rahbarligi ostida jamoa 36 ta o‘yin o‘tkazib, 16 ta g‘alaba, 12 ta durang va 8 ta mag‘lubiyat qayd etgan. Bungacha Belsa Angliyaning “Lids Yunayted”, Fransiyaning “Lill” va “Marsel”, Italiyaning “Latsio”, Ispaniyaning “Atletik” klublari, shuningdek Chili va Argentina terma jamoalarini boshqargan.

Eslatib o‘tamiz, avvalroq Niderlandiya milliy terma jamoasi bosh murabbiyi Ronald Kuman 2026 yilgi Jahon chempionati yakunlanganidan so‘ng, o‘z lavozimini tark etgandi.