Azar yangi jamoa izlamoqda

“Real” klubining sobiq a’zosi Eden Azarga MLS, Braziliya va Saudiya Arabistoni klublari qiziqish bildirmoqda. Bu haqda AS xabar berdi.

Manbaga ko‘ra, futbolchiga Amerika ligasidan “Vankuver”, Braziliya chempionatidan “Botafogo” qiziqyapti. Qayd etilishicha, Azar Saudiya Arabistonidan ham taklif olgan.

Azar 2019 yildan beri “Real”da o‘ynab kelayotgandi. U faoliyati davomida “Chelsi” va “Lill” klublarida o‘ynagan. Eden “qirollik klubi” safida 76 ta o‘yinda maydonga tushib, 7 ta gol urdi va 12 ta golli uzatmani amalga oshirdi. O‘tgan mavsumda belgiyalik futbolchi 10 ta o‘yinda maydonga tushib, 1 ta gol va 2 ta assistga mualliflik qildi.

Azar Madrid klubi safida 2 marta Ispaniya chempioni, 2022/2023 yilgi mavsumda Ispaniya kubogi va 2 marta Ispaniya Superkubogini qo‘lga kiritgan. 32 yoshli futbolchi 2021/2022 yili jamoasi bilan Yevropa Chempionlar ligasi g‘olibi bo‘lgan.