Azar Mbappeni mehmonga chaqirdi

“Real”ning sobiq vingeri Eden Azar Madrid klubining yangi hujumchisi Kilian Mbappeni mehmonga taklif qildi. Bu haqda “Onze Mondial” xabar berdi.

“Biz Kilianni Belgiya uslubidagi barbekyu bilan kutib olamiz. Uyimda bo‘sh xona bor, u xohlasa menikiga ko‘chib o‘tishi mumkin, muammo yo‘q”, deydi Azar.

Ma’lumot uchun, Azar 2023 yilning oktyabrida 32 yoshida futbol bilan xayrlashdi. Belgiyalik futbolchining so‘nggi klubi “Real Madrid” bo‘lib, u 2019 yilda Madrid superklubi tarkibiga kelib qo‘shilgan. 33 yoshli belgiyalik futbolchi “Lill” va “Chelsi” klublarida ham to‘p surgan. U klubdagi faoliyati davomida 623 ta o‘yin o‘tkazib, 167 ta gol urgan va 157 ta golli uzatmani amalga oshirgan.

Qayd etish joiz, 3 iyun kuni Kilian Mbappe rasman “Real Madrid” futbolchisiga aylandi. U “qirollik klubi”da yiliga soliqlardan tashqari 15 million maosh oladi. Mbappening shartnomasida 1 milliard yevro tovon puli ham belgilangan.