Ayrim tovarlarni O‘zbekistonga olib kirishda import boji bekor qilindi

2022 yilning 31 dekabriga qadar bir qancha tovarlarni O‘zbekistonga olib kirishda import boji bekor qilinadi. Bu haqda Prezident Shavkat Mirziyoyevning “2022 yil uchun O‘zbekiston Respublikasining Davlat byudjeti to‘g‘risidagi qonun ijrosini ta’minlash chora-tadbirlari to‘g‘risida”gi qarorida keltirilgan.

Qayd etilishicha, endi yog‘, go‘sht va bug‘doy uni importi uchun hech qanday boj talab qilinmaydi.

2022 yilning 31 dekabriga qadar O‘zbekiston hududiga olib kirishda import bojining nol stavkasi qo‘llanadigan tovarlar ro‘yxati:

•  0105-tovar pozitsiyasida ko‘rsatilgan yangi so‘yilgan, sovitilgan yoki muzlatilgan uy parrandasi go‘shti va qo‘shimcha ozuqabop mahsulotlar;

•  bug‘doy uni yoki bug‘doy-javdar uni;

•  1006-tovar pozitsiyasida ko‘rsatilgan guruchdan tashqari boshqa usullarda qayta ishlangan (masalan, oqishoq yoki yanchilgan ko‘rinishda po‘sti tozalangan, bosilgan, yorma qilib qayta ishlov berilgan, (oqlangan) boshoqli donlar;

•  butun, yorma ko‘rinishida bosilgan yoki yanchilgan boshoqli don murtagi;

•  kimyoviy tarkibi o‘zgartirilmagan holda tozalangan yoki tozalanmagan kungaboqar, maxsar yoki paxta moyi va ularning fraksiyalari;

•  sovun; tarkibiga sovun qo‘shilgan yoki qo‘shilmagan, bruslar shaklidagi yoki qoliplangan buyumlar ko‘rinishidagi sovun sifatida ishlatiladigan yuzaga faol ta’sir ko‘rsatuvchi organik moddalar va vositalar;

•  suyuqlik yoki krem ko‘rinishidagi va chakana sotish uchun qadoqlangan, tarkibiga sovun qo‘shilgan yoki qo‘shilmagan, yuzaga faol ta’sir ko‘rsatuvchi organik moddalar va terini yuvish vositalari;

•  yuzaga faol ta’sir ko‘rsatuvchi organik moddalar (sovundan tashqari); tarkibiga sovun qo‘shilgan yoki qo‘shilmagan (3401-tovar pozitsiyasidan tashqari) yuzaga faol ta’sir ko‘rsatuvchi moddalar, yuvish vositalari (shu jumladan yordamchi yuvish vositalari) va tozalash vositalari.