“Asr to‘foni”: “Milton” yuzlab uylarni vayron qildi (foto)

AQSHning Florida shtati sohillariga bir kechada yetib kelgan “Milton” to‘foni tufayli birinchi o‘lim holatlari qayd etildi. Bu haqda CNN xabar berdi.

So‘nggi ma’lumotlarga ko‘ra, olti kishi halok bo‘lgani tasdiqlandi, biroq qurbonlar ko‘proq bo‘lishi mumkin. Qurbonlar shtat sharqidagi qariyalar uyi nuroniylaridir.

10 oktyabrga o‘tar kechasi Karib dengizida hosil bo‘lgan "Milton" to‘foni Florida shtatiga yetib bordi va Amerika shtatiga 195 km/soatgacha bo‘lgan shamol va kuchli yog‘ingarchilik bilan zarba berdi. Bir necha soat ichida yog‘ingarchilik darajasi ko‘p oylik me’yordan oshib, 3 milliondan ortiq odam elektr energiyasiz qoldi.

2005 yildagi mashxur “Katrina”dan keyingi eng kuchli to‘fon bo‘lgan “Helen” to‘fonidan ikki hafta o‘tmay, Floridani “Milton” tropik sikloni qamrab oldi. U oktyabr oyi boshida Karib dengizida shakllangan va tez kuchayib, eng yuqori toifadagi dovulga aylangan.

Uning kelishidan oldin Florida shtatining bir qancha hududlarida kuchli tornadolar paydo bo‘lgan va kuchli yog‘ingarchilik bo‘lgan. Mutaxassislarning fikricha, 9 oktyabr kuni kamida 27 ta tornado qayd etilgan.

“Milton” tunda Floridani g‘arbdan sharqqa kesib o‘tib, Atlantika okeaniga tushishi kutilmoqda. Florida shtatining “Milton” o‘tishi taxmin qilingan hududlari aholisi xavf haqida oldindan ogohlantirilgan. Rasmiylar 7,2 millionga yaqin aholi istiqomat qiladigan 15 okrug aholisini evakuatsiya qilishni qat’iy tavsiya qildi.

Dovul kelishi paytida uylarini tashlab ketgan deyarli 100 ming kishi shtatning xavfsiz hududlarida vaqtinchalik yashash markazlarida bo‘lgan. Aeroportlar, ko‘ngilochar markazlar va tematik bog‘lar mintaqada yopilgan.

PowerOutage.us ma’lumotlariga ko‘ra, elektr uzatish ustunlarining qulashi, simlarning uzilishi va podstansiyalarning vayron bo‘lishi sababli hozirda deyarli 2,8 million uy va binolar hamda 3 milliondan ortiq iste’molchi elektr energiyasisiz qolgan. 

Florida gubernatori Ron DeSantisning so‘zlariga ko‘ra, 125 ga yaqin uy, ularning aksariyati ko‘chma uylar vayron bo‘lgan.

Mintaqada joylashgan jahon nashrlarining muxbirlari xabar berishicha, ular shamol daraxtlarni qanday yulib tashlashini, tom parchalari, reklama konstruksiyalari, svetoforlarni olib o‘tishini o‘z ko‘zlari bilan ko‘rgan.

Sarasotalik meteorolog Metyu Kapuchchining aytishicha, uning ro‘parasida yaqin atrofdagi mehmonxona tomidan beton skameyka qulagan.

 “Tong otganda ko‘z o‘ngimizda nimalar paydo bo‘lishini bilmaymiz. Shamol juda dahshatli, men hech qachon bunday shovqinni eshitmaganman va butun umrim davomida Tampada yashaganman”, dedi Tampa shahar kengashi raisi Gido Maniskalko.

“Reuters” agentligi bilan suhbatlashgan sug‘urta bo‘yicha ekspertlarning hisob-kitoblariga ko‘ra, “Milton” to‘foni keltirgan zarar 100 milliard dollardan oshishi mumkin.

Dovul oqibatlarini bartaraf etish uchun Floridaning o‘zi va boshqa shtatlardan Milliy gvardiyaning 9 ming nafar a’zosi safarbar qilingan. Florida shtatida hozirda 50 000 dan ortiq kommunal xizmatchilar, shu jumladan, Kaliforniyadan ham olisda ishlamoqda.