Argentinada AESdagi yong‘in tufayli 20 mlnga yaqin odam elektrsiz qoldi

Argentinada yaylovdagi yong‘in Atucha I atom elektr stansiyasini ishdan chiqardi. Oqibatda 20 milliondan ortiq iste’molchi elektrsiz qoldi. Bu haqda “La Nacion” nashri xabar berdi.

Ma’lumotlarga ko‘ra, joriy yilning 1 mart kuni issiq va quruq ob-havo sharoitida mamlakat shimoli-g‘arbidagi yaylovlarda yong‘in sodir bo‘lgan.

Yong‘in oqibatida Atucha I AESining 3 ta yuqori voltli elektr liniyalari yonib ketgan. Shundan so‘ng, AES to‘xtatib qo‘yilgan. Poytaxt Buenos-Ayres va yana 11 ta provinsiya elektrsiz qolib ketgan.

Mamlakat Energetika vazirligiga ko‘ra, 6 millionga yaqin uy xo‘jaligi yoki 20 million kishi elektr tarmog‘idan uzilgan. Bu umumiy iste’molchilarning 40 foiziga yaqinini tashkil etadi.

2022 yil holatiga ko‘ra, Argentinada 46 million kishi yashaydi.

Atucha I atom elektr stansiyasi Buenos-Ayres shahridan 100 kilometr uzoqlikda, Lima shahridagi Parana-de-las-Palmas daryosining o‘ng qirg‘og‘ida joylashgan. Uning qurilishi 1968 yil iyun oyida boshlangan. 1974 yil iyun oyida ob’ekt foydalanishga topshirilgan.