Arazlashuv: Meloni sammitda Tramp bilan yonma-yon turishdan bosh tortdi

Italiya Bosh vaziri Jorja Meloni Turkiya Prezidenti Rajab Toyib Erdo‘g‘andan NATO sammitida uni AQSH Prezidenti Donald Tramp bilan yonma-yon qo‘ymaslikni so‘radi. Bu haqda “Haberler” xabar berdi.

Anqarada o‘tayotgan NATO yetakchilarining 36-sammiti nafaqat xavfsizlik masalalari muhokamasi, balki AQSH Prezidenti Donald Tramp va Italiya Bosh vaziri Jorja Meloni o‘rtasidagi tarang munosabatlar haqidagi xabarlar bilan ham diqqat markazida bo‘lib turibdi.

“Haberler”ning yozishicha, Italiya hukumati rahbari sammit mezboni Rajab Toyib Erdo‘g‘anga murojaat qilib, rasmiy tadbirlar davomida uni Trampning yoniga qo‘ymaslikni iltimos qilgan.

Nashrga ko‘ra, bunga ikki siyosatchi o‘rtasida davom etayotgan ommaviy dahanaki jang sabab bo‘lgan. Turkiyaga safardan biroz oldin Tramp ijtimoiy tarmoqlarda Meloniga qaratilgan post qoldirib, unda “Uni chetlatish uchun order kerak” degan iborani ishlatgan.

Nashr talqiniga ko‘ra, Melonining iltimosi yangi nizoli vaziyatdan qochish maqsadida rasmiy suratga tushish marosimi paytidagi protokol bo‘yicha joylashish va saf tortishga tegishli bo‘lgan.

Yetakchilarning birgalikdagi umumiy surati tushilayotgan vaqtda jurnalistlar e’tiborini ishtirokchilarning joylashuvi o‘ziga tartgan. Meloni Ispaniya Bosh vaziri Pedro Sanchesning yonidan joy olgan va Trampdan sezilarli darajada uzoq masofada turgan. 

Eslatib o‘tamiz, siyosatchilar o‘rtasida katta mojaro kelib chiqqan edi. Tramp Italiya Bosh vaziri Jorja Meloni G7 sammiti paytida “u bilan suratga tushishni o‘tinib so‘raganini” da’vo qilgandi. Keyinchalik Italiya Bosh vaziri Amerika yetakchisining bu so‘zlarini uydirma deb atab, rad etdi.

Ushbu shov-shuvli mojaro fonida darhol Italiya Tashqi ishlar vaziri Antonio Tayani AQSHga rejalashtirilgan tashrifini bekor qildi. Tramp esa Meloni bilan boshqa do‘st bo‘lishni istamasligini bayon etdi.