Arab-musulmon delegatsiyasi Lavrov bilan kelishib oldi

Kecha, 21 noyabr kuni Arab davlatlari ligasi va Islom hamkorlik tashkilotiga a’zo mamlakatlarning Tashqi ishlar vazirlaridan iborat delegatsiya Moskvada bo‘lib, Rossiya TIV rahbari Sergey Lavrov bilan uchrashdi. Bu haqda Rossiya Tashqi ishlar vazirligi ma’lum qildi.

Muzokaralarda Yaqin Sharqdagi vaziyatni tartibga solish masalasi muhokama qilingan. Rossiya diplomatiyasi rahbari mojaroning barcha tomonlariga mos keladigan yechimni ishlab chiqish zarurligini aytgan.

“Ikki davlat kelishuviga asoslangan uzoq muddatli barqaror kelishuv shartlariga erishish uchun tashqi hamrohlik mexanizmini yaratish haqida o‘ylaganimizda, bunday mexanizm haqiqatan ham ish berishi va aniq haqiqatni to‘liq hisobga olishi haqida jiddiy o‘ylashimiz kerak. Chunki ko‘p yillar davom etadigan va hamma uchun mos keladigan yechimga qanday erishish mumkinligini mintaqa davlatlari boshqalarga qaraganda yaxshiroq tushunadi”, degan Lavrov.

Rossiya TIV tomonidan tarqatilgan bayonotda aytilishicha, uchrashuvda Rossiya va arab-musulmon hamjamiyatining ushbu inqirozdan chiqish yo‘llariga yondashuvlari mushtarakligi tasdiqlangan. Tomonlar barqaror o‘t ochishni to‘xtatish rejimini tezroq o‘rnatish, tinch aholi himoyasini ta’minlash, xalqaro gumanitar qonunlarga rioya qilish, gumanitar yo‘laklarni ochish, G‘azo sektoridan evakuatsiya tadbirlarini davom ettirish va garovga olinganlarni ozod qilish tarafdori ekanini bildirgan.

Uchrashuv ishtirokchilari, shuningdek, BMT va Arab Tinchlik Tashabbusining qarorlari asosida Falastin muammosini keng qamrovli siyosiy yo‘l bilan hal qilishdan boshqa iloj yo‘qligini ta’kidlagan.

“Tomonlar o‘rtasida muzokaralar o‘tkazish uchun shart-sharoit yaratishga qaratilgan xalqaro sa’y-harakatlarni faollashtirish zarurligini ta’kidladilar, buning natijasi 1967 yil chegaralari doirasida Isroil bilan tinchlik va xavfsizlikda birga yashaydigan, poytaxti Sharqiy Quddus mustaqil Falastin davlatini yaratish bo‘lishi kerak”, deyiladi xabarda.

Bundan tashqari, tomonlar Yaqin Sharqni keng qamrovli tartibga solish muammolarini tezkorlik bilan hal qilish manfaatlari yo‘lida harakatlarni muvofiqlashtirishni kuchaytirishga kelishib olgan. 

“Ushbu maqsadlarda tashqi siyosat idoralari o‘rtasidagi keyingi aloqalar jadvali, jumladan, BMT doirasida hamda Rossiya bilan Arab Ligasi va Islom hamkorlik tashkiloti o‘rtasidagi hamkorlik mexanizmlari kelishib olindi”, deyiladi Rossiya TIV xabarida.

Ma’lumot uchun, arab-musulmon delegatsiyasi tarkibida Saudiya Arabistoni Tashqi ishlar vaziri Faysal bin Farxon Ol Saud, Misr Tashqi ishlar vaziri Sameh Shukri, Indoneziya Tashqi ishlar vaziri Retno Marsudi, Iordaniya Tashqi ishlar vaziri Ayman Safadi, Falastin Tashqi ishlar vaziri Riyod Malikiy va Islom hamkorlik tashkiloti Bosh kotibi Hissayn Brahim Taha bo‘lgan. Ular 11 noyabr kuni Ar-Riyodda bo‘lib o‘tgan G‘azo sektoridagi vaziyat bo‘yicha Arab davlatlari ligasi va Islom hamkorlik tashkilotining navbatdan tashqari qo‘shma sammiti qarori bilan tuzilgan qo‘mita tarkibiga kiritilgan.

Eslatib o‘tamiz, 20 noyabr kuni mazkur delegatsiya Pekinda bo‘lib, Xitoy Tashqi ishlar vaziri Van I bilan muzokara o‘tkazgandi. Ular endilikda Fransiya, Buyuk Britaniya va AQSHga ham borishi kutilmoqda.