Arab davlatlari Trampning “G‘azoni tozalash” so‘rovini rad etdi

AQSH Prezidenti Donald Tramp falastinliklarni Misr va Iordaniyadagi yangi uylarga vaqtincha yoki uzoq muddatga ko‘chirishni taklif qilgan, biroq na bu davlatlarning rasmiylari, na Falastin yetakchilari, na Respublikachilarning arab tarafdorlari tashabbusni qo‘llab-quvvatlamadi. Bu haqda arab davlatlarining Tashqi ishlar vazirliklari xabar berdi.

Xususan, Misr TIV bayonotiga ko‘ra, mamlakat Falastin xalqining o‘z zaminida yashash huquqini qo‘llab-quvvatlaydi va qayta joylashtirish, bu hududlarni qo‘shib olish yoki falastinliklarni ko‘chirishga urinishlarni rad etadi.

“Bunday harakatlar barqarorlikka tahdid soladi, mintaqada mojaroning yanada kengayishiga olib keladi hamda tinchlik hamda birgalikda yashash imkoniyatlariga putur yetkazadi”, deyiladi bayonotda.

Iordaniya Tashqi ishlar vaziri Ayman Safadi esa qirollikning falastinliklarni joylashtirish bo‘yicha pozitsiyasi hech qachon o‘zgarmasligiga va’da berdi.

“Falastin masalasining yechimi Falastinda, Iordaniya iordaniyaliklar uchun, Falastin esa falastinliklar uchun”, deydi u.

Falastin ma’muriyati rahbari Mahmud Abbos ham xuddi shunday pozitsiyani egallab, G‘azoni Falastin anklavidan tashqariga ko‘chirish bo‘yicha “har qanday loyihani” qoraladi va falastinliklar “o‘z yerlari va muqaddas joylaridan voz kechmasligiga” ishontirdi.

Ularning bayonotlari Oq uy rahbari Donald Trampning falastinliklarni Misr va Iordaniyaga joylashtirish, ular uchun uylar qurish taklifiga munosabat bo‘ldi. Siyosatchi bu fikrni Iordaniya Qiroli Abdulloh II bilan muhokama qilgani va Misr Prezidenti Abdulfattoh as-Sisi bilan gaplashishni rejalashtirayotganini aytdi.

“Siz bir yarim million odam haqida gapiryapsiz va biz hammasini tozalaymiz. Bilmadim. Nimadir qilish kerak, ammo hozir bu tom ma’noda vayron qiluvchi maydon”, dedi Tramp.

U falastinliklar Misr va Iordaniyada “vaqtinchalik yoki uzoq muddatli” bo‘lishi mumkinligini eslatib o‘tdi.

Uning izohlaridan u G‘azo sektorining barcha aholisi haqida gapirayotgani yoki ulardan ba’zilari haqida gapirayotgani aniq bo‘lmadi. G‘azo sektori aholisi 2 million kishiga yetdi, 2,3 milliondan ortiq ro‘yxatga olingan falastinlik qochqinlar allaqachon Iordaniyada istiqomat qilmoqda.

Trampning g‘oyasi Falastinning HAMAS guruhi rahbariyati tomonidan qat’iyan rad etildi va arab amerikaliklarni respublikachiga ovoz berishga chaqirgan “Arab amerikaliklar Tramp uchun” tashkiloti ularni falastinliklarga qarshi “yirtqich da’volar” qilmaslikka chaqirdi.