Apple funksiyasi Androidga ko‘chyapti

Google Apple'da mavjud bo‘lgan funksiyaning Android versiyasini taqdim etmoqchi. Ushbu yangilik foydalanuvchilarga turli xil gadjetlarni bir-biriga ulash imkonini beradi. Bu haqda Android mutaxassisi Mishal Rahmanga tayanib “The Verge” nashri xabar berdi.

Bu funksiya orqali foydalanuvchilar barcha Android qurilmalarini bir-biriga ulashi mumkin. Misol uchun, Apple'dagi “iPhone mobil qo‘ng‘iroqlari” funksiyasi bir xil Apple ID tizimiga kirgan Mac va iPad kabi qurilmalar orqali qo‘ng‘iroqlarni amalga oshirish va qabul qilish imkonini beradi. Bunda smartfonga kelgan qo‘ng‘iroqqa tizimga ulangan boshqa gadjet orqali ham javob berish mumkin.

Shuningdek, Google'ning “Qo‘ng‘iroqlarni almashtirish” funksiyasi iPhone'larda bo‘lmagan imkoniyatni ham taqdim etishi kutilmoqda.  Bunda foydalanuvchi telefonda amalga oshirayotgan qo‘ng‘irog‘ini o‘sha vaqtning o‘zida tarmoqqa ulangan boshqa qurilmaga yo‘naltirishi mumkin. 

Rahmanning bildirishicha, ushbu xususiyat rasman chiqarilgandan so‘ng, uni “Qurilmalaringizni bog‘lang” menyusida Sozlamalar > Google > Qurilmalar va almashish bo‘limlariga kirish orqali yoqish mumkin. 

Google Android qurilmalarini ulash funksiyasini va uning amaliyotga tatbiq etilish sanasini hali e’lon qilmagan.

Eslatib o‘tamiz, Google foydalanuvchilarga internetda keraksiz shaxsiy rasmlarni nazorat qilish va fotosuratlar qidiruvlarda osongina ko‘rinmasligini ta’minlash uchun yangi maxfiylik tizimini ishga tushirmoqda.