Apple функцияси Андроидга кўчяпти

Google Apple'да мавжуд бўлган функциянинг Андроид версиясини тақдим этмоқчи. Ушбу янгилик фойдаланувчиларга турли хил гаджетларни бир-бирига улаш имконини беради. Бу ҳақда Андроид мутахассиси Мишал Раҳманга таяниб “The Verge” нашри хабар берди.

Бу функция орқали фойдаланувчилар барча Андроид қурилмаларини бир-бирига улаши мумкин. Мисол учун, Apple'даги “iPhone мобил қўнғироқлари” функцияси бир хил Apple ID тизимига кирган Mac ва iPad каби қурилмалар орқали қўнғироқларни амалга ошириш ва қабул қилиш имконини беради. Бунда смартфонга келган қўнғироққа тизимга уланган бошқа гаджет орқали ҳам жавоб бериш мумкин.

Шунингдек, Google'нинг “Қўнғироқларни алмаштириш” функцияси iPhone'ларда бўлмаган имкониятни ҳам тақдим этиши кутилмоқда.  Бунда фойдаланувчи телефонда амалга ошираётган қўнғироғини ўша вақтнинг ўзида тармоққа уланган бошқа қурилмага йўналтириши мумкин. 

Раҳманнинг билдиришича, ушбу хусусият расман чиқарилгандан сўнг, уни “Қурилмаларингизни боғланг” менюсида Созламалар > Google > Қурилмалар ва алмашиш бўлимларига кириш орқали ёқиш мумкин. 

Google Андроид қурилмаларини улаш функциясини ва унинг амалиётга татбиқ этилиш санасини ҳали эълон қилмаган.

Эслатиб ўтамиз, Google фойдаланувчиларга интернетда кераксиз шахсий расмларни назорат қилиш ва фотосуратлар қидирувларда осонгина кўринмаслигини таъминлаш учун янги махфийлик тизимини ишга туширмоқда.