Andijonda 16 yoshli o‘smir o‘zini tomdan tashlab, vafot etdi (video)

Andijonda 9-sinf o‘quvchisi o‘zini tomdan tashlab, vafot etdi. Bu haqda O‘zbekiston Respublikasi Bosh prokurori matbuot kotibi Hayot Shamsutdinov QALAMPIR.UZ’ga ma’lum qildi.

Bildirilishicha, voqea joriy yilning 21 iyun kuni soat taxminan 03:30 larda Andijon shahrida sodir bo‘lgan. Unga ko‘ra, 2008 yilda tug‘ilgan voyaga yetmagan M.K. (o‘g‘il bola) Andijon shahar, “O‘zbegim” MFY, A.Musayev ko‘chasi, 23-raqamli ko‘p qavatli uyning tom qismidan o‘zini tashlab, o‘z joniga qasd qilishi oqibatida hodisa joyida vafot etgan.

Ma’lumotlarga ko‘ra, voyaga yetmagan M.K. ota-onasi vafot etganligi sababli, bobosi Sh.T.ning qaramog‘ida u bilan birga yashab kelgan.

“Mazkur holat yuzasidan shahar prokuraturasi tomonidan sud-tibbiy ekspertizasi tayinlanib, tergovga qadar tekshiruv harakatlari olib borilmoqda”, deyiladi xabarda.

Eslatib o‘tamiz, avvalroq Toshkent viloyatining Olmaliq shahrida yosh qiz o‘zini 16 qavatli binoning tomidan tashlab, vafot etgandi.