Anchelotti YeCHLda yangi rekord o‘rnatdi

Madridning “Real” klubi bosh murabbiyi Karlo Anchelotti Yevropa Chempionlar ligasidagi (YeCHL) g‘alabali o‘yinlar soni bo‘yicha klub tarixidagi eng yaxshi murabbiyga aylandi.

13 dekabrga o‘tar kechasi “qaymoqranglilar” YeCHL guruh bosqichi oxirgi turi doirasida Germaniyaning “Union Berlin” jamoasini safarda 3:2 hisobida mag‘lub etdi.

Anchelotti bu borada “qirollik klubi”ning sobiq ustozi Migel Munosdan o‘zib ketdi. Munos 71 ta bahsda 41 ta g‘alaba qayd etgan bo‘lsa, italiyalik mutaxassis 56 ta o‘yinda 42-g‘alabani tantana qildi.

Shunday qilib, “Real” Yevropa Chempionlar ligasi “S” guruhidagi olti o‘yinning barchasida g‘alaba qozondi. Madrid klubi oxirgi marta 2014/15 yilgi mavsumda guruh bosqichining barcha o‘yinida g‘alaba qayd etgandi: o‘shanda jamoa “Bazel”, “Ludogorets” va “Liverpul” bilan bir guruhda o‘ynagan.

“Real” 18 ochko bilan “S” guruhida 1-o‘rinda, Italiyaning “Napoli” klubi esa 10 ochko bilan 2-o‘rin turnirning pley-off bosqichiga yo‘l oldi.

Navbatdagi uchrashuvda Karlo Anchelotti shogirdlari “Vilyarreal” bilan La Liga doirasida to‘qnash keladi. Uchrashuv 18 dekabrga o‘tar kechasi Toshkent vaqti bilan soat 01:00 da start oladi.