Anchelotti o‘z rekordini takrorladi

Madridning “Real” klubi Ispaniya La Ligasining 19-turida o‘z maydonida “Malorka”ni kichik hisobda mag‘lub etdi (1:0). Uchrashuvdagi yagona golga 78-daqiqada madridliklarning germaniyalik himoyachisi Antonio Ryudiger mualliflik qildi.

Shunday qilib, “Real” uy o‘yinlaridagi mag‘lubiyatsiz seriyasini barcha musobaqalarni qo‘shib hisoblaganda 19 ta o‘yinga yetkazdi (16 g‘alaba, 3 durang). Bu natija orqali “qaymoqranglilar”ning italiyalik ustozi Karlo Anchelotti o‘z boshqaruvidagi eng yaxshi natijani takrorladi. 

“Real Madrid” bunday natijaga birinchi marta 2022 yilning aprelidan 2023 yilning fevraligacha bo‘lgan davrda (14 g‘alaba, 5 durang)  erishgandi.

La Liganing ortda qolgan 19 ta turidan keyin “qirollik klubi” 48 ochko bilan turnir jadvalida peshqadamlik qilmoqda. Xuddi shuncha ochko to‘plagan va oxirgi turda “Atletiko”ni 4:3 hisobida mag‘lub etgan “Jirona” 2-pog‘onada qayd etilgan. Kuchli uchlikni 38 ochko jamg‘argan “Atletiko” yakunlab bergan.